超狂朋友圈曝光！李靚蕾網晒與影后名媛合照惹熱議

和台灣天王王力宏爆發連串離婚風波的李靚蕾沉寂多時，最近重新活躍於社交網，繼早前為子女變裝預祝萬聖節後，昨日（31日）萬聖節正日，佢就相約一眾閨蜜狂歡，並於社交網限時動態PO出照片，兼逐一標籤好友，發現其姊妹陣容卡士強勁，當中包括影后許瑋甯、楊謹華、名媛孫芸芸、阿信前女友劉薇，以及最近於內地翻Hit爆紅嘅王心凌，李靚蕾又留言寫上：「療愈的時光」、「每次都笑瘋」、「Girlstime」等，見佢哋對鏡頭扮鬼臉、裝可愛，完全冇偶像包袱，而照片一出亦引起網民熱議，驚訝原來佢哋私底下咁老友，意外曝光其「超狂朋友圈」。

另外，李靚蕾為咗氹仔女開心，亦親手製作南瓜燈，佢公開製作片段並表示：「超好玩療愈的南瓜燈，挖出來的南瓜+南瓜籽不浪費，作了南瓜濃湯/烤瓜子/南瓜派還有南瓜燉飯，滿屋子亮晶晶，南瓜香味四溢」，出心出力為博小朋友一笑，認真係廿四孝好媽媽。