洪嘉豪完成紅館個場元氣大傷 自信英語能力能應付音樂課程

啱啱完成兩場紅館演唱會嘅 洪嘉豪 ，尚未回氣又出席品牌活動，見佢越嚟越瘦兼一臉倦容，睇嚟開完個唱嘅嘉豪元氣大傷喎。佢就話因為高估咗自己嘅體能，雖然經埋人問佢完騷後駛唔駛休息下先，但係自己就懶醒話無問題，可以照常工作，點知原來自己嘅體力真係吃不消，所以佢話呢排除咗成日想瞓覺之外，亦有不停食嘢希望恢復體力，無辣不歡嘅佢，當然唔少得勁食辣嘢啦。

話晒第一次喺紅館開演唱會，壓力真係唔細，嘉豪覺得仲有好多要改進嘅地方，佢話好感激嘉賓之一 張敬軒 傳授咗唔少舞台經驗比佢，又話自己第一場換造型時，每次換完上台都會上氣唔接下氣咁，軒仔就教佢無論身邊嘅人幾急幾趕，自己都要調適自己嘅步伐，嘉豪話第二場，佢真係用咗軒仔嘅方法，果然改善咗好多。

軒仔唔單止樂意分享自己嘅舞台經驗，佢更送咗一年美國知名音樂學院線上課程比嘉豪，家豪承諾一定會好好珍惜呢個進修機會，佢仲好有信心自己嘅英語能力可以應付到，佢話自己係讀英文中學，所以英文唔太差，聆聽應該無問題，仲話音樂已經係一種語言。