城中鏡：華懋慈善行撐保育
呢幾日天氣轉涼，秋高氣爽，好適合行山。華懋集團尋日舉辦第四屆華懋行，華懋慈善基金主席龔仁心同太太劉元春揸住行山拐杖，同一眾名人齊齊漫步大潭郊野公園。龔仁心姊姊龔中心同妹妹龔因心亦有現身，仲同嘉賓及參加者一同穿上綠色T恤，唔使多講，佢哋梗係想帶出環保訊息喇！不過今次活動得益對象都幾特別，就係被海洋公園用喺支持又名「飛蛙」嘅「越南海倫樹蛙」保育研究。
龔因心（左起）、龔仁心夫婦同龔中心一齊身體力行撐保育。
蘇樺偉（右）同母親一同出席活動。
高永文（右）偶遇行山嘅黃錦星夫婦（中及左）。
周肇平登神山難忘
講起做運動，龔仁心話中學時好鍾意游水，仲係游蛙式，曾經參加過唔少市級嘅游泳比賽添！不過，依家佢做運動就唔係游水，而係同太太結伴行山欣賞風景。呢日慈善步行之前，佢仲先由陽明山莊行去起步點當熱身。
一齊行山嘅仲有香港金牌田徑項目傷健運動員蘇樺偉、香港大學副校長周肇平等人。周肇平話閒時會去唔同地方行山，當中行過最辛苦嘅莫過於馬來西亞沙巴嘅神山。記得當時差唔多每一小時就落一次雨，舉步維艱。
食物及衞生局局長高永文喺台上主禮時，滋滋油油咁於衫袋掏出一支蚊怕水，笑笑口話自己有職業病，要提醒大家做足防蚊措施，預防登革熱咁話。佢行落台之後，仲幫龔中心等主禮嘉賓噴手添！儀式完結後，一向受歡迎的高永文例牌畀市民捉住合照，不遠處突然有把聲音話：「局長可唔可以同我影張相？」眾人擰轉頭一望，竟然係環境局局長黃錦星同太太梁素雲咁啱行過，三人隨後即興行咗一段路，認真有緣。
