【蹄聲妙影】夏蕙姨移民 勿忘入電芯

疫情改善，馬會重新開放畀公眾網上訂位入場以來，場內人氣指數直線上升，報紙霸位情景重現，更帶動跑馬地同沙田一帶嘅消費，與之前半閉門式作賽，簡直係天與地，家陣隨時搵到個上半part靚女影吓，攝記們有番貨交。

人多咗，自然多咗八卦嘢聽，最近同啲行家開跑前，一如以往企晒喺馬匹亮相圈外圍迎賓，索吓有咩達官貴人同明星入場，豈料電子嘢話停就停，東星支閃光燈冇電，諗住調大部相機ISO頂住先。此時，有位資深行家叫東星咪亂嚟，事關有行家試過因此瀨嘢。

事緣有次某主題賽馬日，黃夏蕙入到場，騎練、馬匹及馬迷無不向佢行注目禮，而娛樂版同馬經版嘅攝記都會圍住佢影相交差，通常都會見報。拍攝期間，有位攝記支閃光燈唔記得入電，照樣發出相機塞打聲，以為裝假狗過到骨，但夏蕙姨寶刀未老，眼角一郁，即時指住嗰位攝記，話佢部相機冇閃，畀多次機會佢再影，場面老尷，可見明星嘅鏡頭觸角有幾敏銳。

相反跑夜馬影頭馬相時，邊個支閃燈冇閃，係你自己蝕章，所以馬主同騎練一樣笑得好燦爛，以為你特登玩藝術。此外，夏蕙姨話8月要離開香港，聽講係移民，而且冇訂歸期，有緣再會時，攝記們一定要記得入電唷！

初步提供:

第2場8「濃有」

第3場10「胡椒軍曹」

■東星