5招一定要識的Google Maps密技

不少人搵路、去旅行、駕車都會用Google Maps，你又知唔知道Google Maps除了可以導航、睇街景之外，其實仲有不少實用的功能，假如你未用過以下介紹的秘技，就唔算真正識得用Google Maps啦。

「ok maps」下載離線地圖

去到外地旅遊，尤其是去到山旯旮的地方，網絡訊號未必咁好，無得上網令Google Maps無法發揮效用。其實Google Maps本身就提供離線地圖功能可供下載，只要縮放到想儲存的位置，然後在搜尋列中輸入「ok maps」，該地區就可以下載，之後算去到沒有網絡的地方，都可以開啟離線地圖搵路。要提一提離線地圖並非所有地方都適用，例如香港、日本、台灣等暫不支援，反而澳洲、美國、英國等地方可供下載。

單指縮放地圖

大家好多時用Google Maps，都會將地圖放大縮細，最常用都係篤兩下芒，之不呢種Double Click的方法只限於放大畫面，做唔到縮細畫面。其實要做到放大和縮細動作，一隻手指都搞得掂，只要篤兩下芒並按住不放，再將手指向下拉，即可放大地圖，相反向上拉則能夠縮小畫面，對於習慣單手玩電話的用家就幫到手。另外，用兩隻手指同時向上拉，便能夠將平面地圖變成立體化，而向下拉則會變回原來的平面地圖。

探索周邊搵啖食

唔少人搵食肆都會用《OpenRice》，之不過Google Maps強大之處唔單止可以幫你搵路，仲可以幫你搵食。皆因只要定位你身處的座標，然後按一下下方「探索周邊」，Google Maps就會顯示附近食肆的營業時間、電話等，更會分門別類如西餐、日餐、甜品等，甚至乎連短評都有，就好似一個簡易版《OpenRice》。除了餐飲之外，還有附近的商場、戲院、公園等休閒設施Show畀你睇。

查看道路情況免遲到

唔好以為睇路況只適用於駕駛人士，其實對於打工仔、學生來說更加需要，事關未出門之前可以話畀你知邊度塞車，咁就可以揀搭地鐵或巴士，避免返工返學遲到啦。只要按一下Google Maps搜尋列旁邊的三間圖案，然後點選「交通資訊」，道路就會呈現深紅、紅、橙、綠唔同顏色，當中以深紅為最繁忙，而綠色就代表最暢通，見到深紅色就要避過去。

快速睇360度實景街道

之前Google Maps就加入了唔少山路，而近期就加入了多條具代表性的香港樓梯街景，包括煤氣燈街、石板街、沙田萬佛寺等，要快速睇實景街道，只要在在地圖上長按，畫面就會並放置紅色的圖釘，再篤一下左下方的小圖，即可快速進入360度實景街道，要睇樓梯街景話咁易。