2012年,無心插柳之下,寫咗男人唔可以窮。 薛可正同張以娜嘅故仔,通過小說同電影,慢慢留喺每一位讀者同觀眾心目中,安撫佢哋自己回憶入面獨有嘅薛可正/張以娜回憶。十年過去,經歷同改變嘅事實在太多,好多讀者又細路變成父母,好多觀眾由欣賞個故事直到宜家明白個故事,呢個係十年間令我最欣慰嘅發現。 呢十年,自己對文字同網絡小說嗁睇法都改變咗好多,試過因為壓力而逃避,亦都試過努力鑽研點樣可以令更多人睇到自己嘅故事,亦試過「要出書」先去寫故事,當然,都有因為錢而去寫故事。 但,呢十年嘅文字之路都係快樂嘅,一條普通蕃薯可以得到大家嘅支持,仲有耐唔耐一句「我好中意睇你寫嘅嘢」,已經足夠我一直寫落去。不過貪心係正常嘅劣根性,其實我一直需要搵一個,我覺得可以開心咁寫故事嘅原因。 疫情期間,我一個人留喺屋企,無聊時拎起支筆,寫一啲我認為無聊嘅小故事。突然發現,寫得愈來愈開心;呢十年發現男人嘅缺點,亦愈來愈多。 因為唔係畀人睇,所以我用白話。我唔理文法,我有白字,但我自己睇得好開心。 就好似十年前,我睇返自己工餘時寫嘅小故事,覺得好過癮,零壓力,最後寫出「男人唔可以窮」。 所以最後我決定,用自己最熟悉嘅方法,創作「男人唔可以窮3」,有白字,錯文法,但用心寫。 我為咗研究平時對話、電話對話同whatsapp對話嘅不同表達方法,用咗一晚。亦隨意咁將一啲生活小事,寫落部份章節入面,以前總係會覺得「咁樣好唔好㗎?」,但今次覺得自己過癮咗先,就係創作嘅最大動力。 十年已經過去,薛可正同張以娜其實一早就有佢哋自己嘅生活,我哋好似安放回憶咁,將佢哋嘅故事好好收起。 男人唔可以窮3,一個將會延續男人一生中不同缺點嘅香港網絡小說,4月11號晚,全廣東話,FaceBook Page/IG雙平台同時每晚〈間中偷懶〉連載。 希望大家期待 張天樂 同 董顧渝 嘅一個人間小故事。 IG:sithoching