再婚僅11個月再爆婚變！謝和弦傳偷食「G奶周子瑜」

台灣歌手「搖滾壞小子」謝和弦前妻戴怡軒（Keanna）早前捲入「炮友風波」，當時謝和弦曾經出言諷刺，惟近日就輪到謝和弦爆出桃色事件，去年與網紅莉婭再婚嘅佢，結婚僅11個月卻爆出婚變，疑情變撻着有「G奶周子瑜」之稱嘅歌手祈錦鈅！事緣莉婭突然於社交網寫下「祝你們幸福快樂」並標籤謝和弦及祈錦鈅，事後莉婭對外透露謝和弦早喺婚前已有追求祈錦鈅，甚至喺婚後有一齊出海過夜，佢坦言唔明白點解謝和弦另有心上人但都要同佢結婚，而講到係咪離婚收場，佢只表示謝和弦指希望同佢繼續一齊工作，但感情上就想有自由，又強調即使日後真係離婚，都唔會後悔。

其實謝和弦早喺2年前，就曾經現身祈錦鈅嘅演唱會，當眾跪地送花示愛，而祈錦鈅就否認做「小三」，指與謝和弦冇感情，之前與謝和弦只相約喺工作室討論合唱歌，至於被指出海過夜，佢就解釋遊艇派對上仲有好多朋友，並非只有謝和弦1人。