人人都講「動物系」男友，外向又忠誠嘅犬系男夠晒熱情，高冷又有性格嘅貓系男就好有挑戰性！咁到底娛樂圈中又有係邊個犬系貓系、鬼馬好動嘅馬騮系、想捧上手心呵護嘅倉鼠系、仲有純過純水嘅兔系男星呢？一齊睇吓佢哋似邊類！動物系女星也不能錯過啊！
登入 瀏覽本網站，可獲取積分換領專屬優惠
點擊查看專屬優惠
兔系—丁子朗、何廣沛
兔仔唔止白雪雪，清純簡單而又活力十足都係一大標記！香港先生出身嘅人氣男星丁子朗外形就已經好煞食，不時於社交網晒操肌相同甜爆笑容，更加騷盡青春氣息，於鏡頭前率真又討喜，唔難令女粉絲心心眼！
何廣沛外形同埋形象都係好白淨，近期憑《跳躍生命線》谷盡人氣嘅佢就更見兔仔靈巧而又有活力嘅一面，感覺正氣而又溫柔體貼，星途似乎都白雪雪，一片光明！
倉鼠系—吳肇軒、姜濤
唔係講緊外型細細粒就係倉鼠系呀，而係感覺慵懶，空靈而又個性率直，而且有俾人感覺勁想保護佢嘅特質，加埋愛玩又或者為食就更加似喇！影壇新星吳肇軒就有呢種氣息，唔知同佢多次演學生哥有冇關？但佢舉手投足散發魅力之外仲有慵懶感，好似同佢匿喺個小世界就好歎咁！
只有19歲嘅小鮮肉姜濤當然有呢種令好多姊姊都想幫手照顧佢嘅感覺，但唔好忽略佢自身努力向上嘅活力，都好似倉鼠忙過不停狂跑咁養眼！
馬騮系—張振朗、游學修
馬騮仔就不折不扣係百厭星啦，感覺就係鍾意打打鬧鬧過日子嘅，拍拖都似乎會整鬼女友又或者時時令佢哭笑不得嘅！圈中無線新一代小生張振朗就勁似馬騮系男孩，於《美女廚房》不時口花花又勁放笑彈晒幽默感外，就連於《踩過界》嘅身手都一樣似馬騮敏捷，事業上瞓身向上爬，好有活力！
至於影圈新星游學修同樣孩子氣又聰明，搞Cap TV晒盡創意之外，於大銀幕落力表現一樣搶鏡，而佢之前同女神蘇麗珊拍拖時，多次被影到冧爆女友嘅時刻，好似小朋友咁毫不掩飾熱情奔放一面。
獅系—王嘉爾、胡子彤
獅子男唔係人人都岩，佢哋自身都迷人魅力，但自信滿滿嘅氣場同於事業上嘅專注度易就被誤會自戀同係事業狂！香港出生嘅韓團GOT7成員王嘉爾（Jackson）就好似獅子男，樣靚又Keep得Fit嘅佢自小練體操同劍擊，於體壇與娛樂圈不但唔係Hea底嘅一群，仲係極力去做No.1，周身刀張張都有殺傷力，加上眼神堅定，散發攝人魅力！
至於《點五步》新星胡子彤亦有過人氣場，上位後接連接拍數部電影，搞笑得Chok到盡亦得，火速搵到定位，掌控情勢，堅定發展！而自小學棒球嘅佢同樣散發專注的魅力，憑自我風格成為新星人氣王之一！
犬系男—周柏豪、張繼聰、余德丞
講番大路嘅犬系男唔難估到有咩特徵啦，鍾意戶外活動同埋與人接觸，仲係朋友多又不吝對另一半表達熱情嘅男孩，性格仲正直善良又忠誠，圈中出名係「愛妻號」又活力十足嘅當然不得不提周柏豪同張繼聰啦！
▲Cosmo聖誕送禮X周柏豪
人緣好而且出名對太太Sweet到盡，不時放閃又專一，完全係典型犬系男！
唔止歌手，無線新一代男神余德丞（Dickson）都勁有犬系男嘅特質，游水踢波主持工作樣樣掂，仲有個感染力強嘅陽光笑容同Fit爆身材，大步檻過之後多次多謝密友蔡思貝，唔忘情又夠冧豬，似足狗仔咁窩心！
貓系男—梁朝偉、余文樂、胡歌
喵星人係超有性格嘅動物，周不時擔天望地一整日都唔望主子一眼，但冧起上嚟就癡身到趕唔走，貓系男就當然都一樣難捉摸、內斂、鍾意宅於家中而且冷靜又心思細膩啦！呢方面影帝梁朝偉就真係中晒咁多樣特質，唔愛應酬，但仍會陪老婆劉嘉玲出席活動，時冷時熱但又完全唔會令人嬲得落，仲好似特別有諗法咁！
余文樂同內地男星胡歌於高冷呢方面都係高手。
內在同外表都有傲氣，但前者私底下愛妻，後者對粉絲亦好貼心，有時送個冧爆笑容或者Chok個電眼，更即時殺死人唔賠命，完全捉唔到路，神秘又吸引！