今日講吓舊時
中學嘅我係一個衰學生
又唔係壞,係衰
衰上堂唔專心、會瞓覺
有帶電話(仲會響…)犯吓校規、駁下咀咁
絕對唔係模範生,係成績過得去
課外活動嘅豐功偉績包括:
喺好出名嘅籃球隊入面毫無建樹
無貢獻到我自己都羞愧地quit咗
成為任期最短一屆學生會成員
因為番咗幾個月學就有SARS等等
簡單來講,冇乜技能
(Er..都仲有drama club一官半職
同埋出去參加下Music Festival咁)
當我啲同學好多都做晒醫生律師建築師嘅時候
我仲發緊夢
發緊明星夢
(係發明星夢㗎喇我唔係入行做咩?😂)
然後慢慢轉移重心去咗做一個blogger/生意人
我發覺我需要好多技能
我雖然有好多不足
但係自問對於消化資料、整合、歸納
再加入我自己嘅意見
清清楚楚咁present出嚟
我應該都做得幾好
係一個唔hea寫嘅好blogger😂
好記得以前老師唔俾我哋講個「搞」字
咩係搞?你係主辦?定係參與?
定係統籌?定係策劃?
咁無詞彙㗎咩你個人?
老師對於我哋出嚟表達自己都有好高嘅要求
呢啲技能都係中學嗰時一班
對我有無限耐性嘅老師用心去栽培出嚟
而對於我呢啲衰人嚟講
品格、修養方面
更加係歷屆嘅班主任、訓輔老師
嘔心瀝血苦口婆心地幫我保住
以至我冇變成一個真•衰人
又返返去明星夢嗰度
正所謂學音樂都要錢丫
呢方面佢哋都好重視亦都會俾好多額外時間
去重點訓練
仲有好多嘢係大個咗先明白
佢哋唔轉直資唔係私校
係希望唔同家庭背景嘅女仔都可以接受優質嘅教育
而嗰時我覺得好老土好長氣嘅崇拜啊、祈禱會呀
啲唔啱音嘅詩歌呀
對於今日已經受洗嘅我來講
更加係埋下左一粒重要嘅種子
我係好鍾意我母校英華女校
講明先唔係因為我個女準備要考學校
佢哋冇幼稚園嘅
今次佢哋製作呢一套紀錄片<十九歲的我>
由金像導演張婉婷執導
花上10年時間拍攝
亦都唔係要宣傳賣飛籌款
因為啲飛已經賣晒喇
我只係覺得好感動
一見到呢條花絮就鈎起起我好多回憶
身遠心莫離 英華學校
惟願我英華 勿徒崇外貌 願爲爾作工 由茲學校
#ywgs #ywgsaa #tomy19yearoldself #fundraising #moviegala #mabelcheung #documentary #love #almamater #education #hongkong #hongkongyouth #memories #movie #給十九歲的我 #英華女學校 #張婉婷