電影泉攻略丨《芙莉歐莎：末日先鋒傳說》被評為R級電影 官方解釋令影迷興奮丨EP101

王鎮泉 Jeoffrey  每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。 

仲未上映嘅電影《芙莉歐莎：末日先鋒傳說》最近被美國電影協會評為R級電影，喺五個級別入面排第二高，未滿17歲嘅年青人，必須要有家長陪同先可以睇。官方解釋因為戲中有強烈暴力同恐怖場面，不過對於呢個系列嘅粉絲嚟講，呢個評語絕對令佢哋更加期待。呢部電影被列為《末日先鋒：戰甲飛車》嘅前傳，稟承上一集大量飛車同動作場面之外，仲搵嚟精靈系女神Anya Taylor-Joy 飾演Furiosa，即係上集Charlize Theron飾演角色嘅年輕版，同樣令到影迷驚喜。

本周新片有
《重慶森林（4K修復版）》1994年由王家衛執導，梁朝偉王菲、林青霞、金城武等主演嘅電影，除咗榮獲當年多個 國際大獎，亦係梁朝偉首登金像、金馬雙料影帝之作，談討喺石屎森林裏面，生活嘅都市人孤獨內心世界。
《挑戰者》講述前網球一姐泰絲因傷退役後，成為網球手丈夫Art嘅教練，並捧佢上一哥位置，但丈夫接連敗北，仲要對戰過氣選手Patrick，Patrick曾係Art死黨，亦是泰絲前度⋯ 三人新仇舊恨，球場上嘅男女三打戰一觸即發。
《犯罪者市：鐵拳清算》馬東石飾演嘅「怪物刑警」今次聯同網路調查組，狙擊韓國最大非法網絡賭博組織。掃蕩過程中，「怪物刑警」既要迎戰特種部隊出身的冷血首領，又要智取幕後主腦嘅IT天才，鐵拳升級越戰越勇，清算賭網罪犯只求有揼錯，無放過！
《劇場版 GIVEN 被贈與的未來 -柊MIX-》 集結青春、樂團同BL元素動漫劇場版，講述一班熱愛音樂嘅男仔，點樣為音樂而生，追逐樂隊之夢，同時又要面對友情同愛情，種種微妙考驗。
《九龍城寨之圍城》講述80年代嘅香港，九龍城寨係一個神秘而亂中有序嘅地方，集結了隱世高手，一名落難青年陳洛軍有日誤闖此地，仲得到城寨傳奇人物龍捲風收留，自始喺度落地生根，點知呢個時候已經有人對九龍城寨虎視眈眈，一場惡戰亦都在所難免。 

本周「新片速遞」
全球最高票房嘅動畫電影係2019年真獅版《獅子王》，一共有16億美元票房，其實幾年前經已有傳會開拍前傳。電影預告片最近播出，預計電影今年年底上映，呢部電影叫《獅子王：木法沙》，顧名思義講述獅子辛巴嘅爸爸木法沙一生，就連辛巴好陰險嘅叔叔刀疤都會回歸。

今個星期嘅票房，截至5月1號中午，第三位係劇場版《排球少年!! 垃圾場的決戰》，而第二位係《特技狂人》，票房冠軍就係《機動戰士高達SEED FREEDOM》。