【跑呀跑，跑咗去邊？@iM網欄】無需為自己設限　不跑就後悔 體育王子伍家謙分享踏上全馬之路

「伍家謙，交比你講體育！」過去廿年有睇開大台新聞長大的相信都對這句耳熟能詳。有「體育王子」之稱的前體育新聞主播伍家謙，運動總是離不開籃球，曾經代表學校參加學界精英賽，近年轉戰長跑，近一兩年更一口氣跑下幾個全馬。

講到何時開始跑步，家謙隨即打開跑步app看看，原來是2013年，但他指當年都是隨心落街兩三公里，或間中報了10公里賽事而已，主要都是打籃球多。與很多跑手一樣，有系統的跑步練習始於2019年尾至2020年初，當時疫情嚴峻，很多球場都被封場。「你完全唔郁又唔得㗎嘛，所以當時跑步就係唯一能夠做到，而門檻又唔係太高，就咁落街就跑得，後來就慢慢加入咗Nike的Pacer Team，所以展開有系統的訓練。另一個原因是由於一對小朋友2020年4月出世，要經常照顧及車出車入，如果唔講去跑步，想出街就無乜藉口同老婆講，慢慢咁就開始咗跑步，成為習慣。」

有關踏上馬拉松之路，家謙指主要是因為2022年底疫情逐漸減退，不少國家及地區通關，很多體育活動回復正常，就不如帶小朋友去旅行。「咁啱身邊有跑開步的朋友有同樣諗法，跟住佢講句：『有馬拉松報唔駛抽喎！不如試吓互相迫害吓！』大家就你一言我一句：『好呀！』『報啦！』『嚟吖！』就咁就上咗賊船，開始認真練習之路。」

▲ 伍家謙在2021年中加入Nike Pacer Team訓練。 （所有圖片由受訪者提供）

家謙由2021年中開始跟Nike Pacer Team，一直跟著半馬組別，見跑了一段時間，就想試試自己全馬的能力。2023年2月率先以3:36:39跑下首馬京都馬拉松，接著4月3:32:29完成倫敦馬，再在11月3:27:41跑完紐約馬，再剛剛在上月初以3:19:10完成東京馬，每一次全馬都創下個人紀錄。問到為何去年一口氣跑下三個全馬那麼多，家謙笑言大部份跑友都有相似的故事：「跑完第一隻，大家就會話以後唔好跑啦！以後唔好搞我啦！但休息完之後就會問朋友:下次報哪一隻好啊？我自己第一次跑全馬沒有特定任何目標，但跑出來又不是太差，會想一想我這個年紀還可以去到什麼成績呢，做任何事若果不盡力就沒有意思，由於身邊不少朋友都有挑戰六大馬冬甩獎牌的想法，又好似幾得意，又可以順道探訪親朋戚友，好似唔錯，所以就跑了那麼多！」

▲ 家謙對初馬京都馬拉松時間滿意，展開跑更多全馬之路。

至於今次東京馬的時間，家謙表示比預算中理想，因為紐約馬3:27，心想快兩分鐘3:25已經很好，加上自己工作不定時，經常練習「甩底」，幸好因為天時地利人和所以做出sub320的時間，實在開心，亦因此達到BQ （波士頓馬拉松的參賽資格），但由於波馬太多人報名參加，2024年波馬需要比BQ快多5分半鐘才能穩奪參加資格，所以家謙的短期目標就希望跑到3小時12至13分這些完賽時間，希望能夠先報名參加九月尾的最速馬拉松—柏林馬拉松，然後跑到波馬目標時間。

▲ 家謙在東京馬拉松創下佳績，並達到波士頓馬拉松的入門門檻。

由於距離下一個賽還有一段時間，家謙指其Nike教練陳偉明定了一些目標給他，以免疏懶，包括5k sub19及10k sub 40，但速度是家謙的弱項，之前幾次馬拉松都是很遲才知道有資格參與，所以沒有太著力鍛鍊速度。至於估計何時達標，家謙指：「每日嘅狀態都唔同㗎嘛，但係我會將我個方向集中喺練習嘅質素同埋嗰個量嗰度，多過睇一定要幾時幾時做到呢件事，因為我相信只要你練得啱練得足嘅話，呢樣嘢就會出嚟㗎啦！」那麼有無想過sub3？「如果真係有一直練習嘅話點都會諗吓㗎喇！但係你話係咪能夠好快可以做到？我就覺得唔係，即係可能要再調整好多作息、控制好多飲食，或者在訓練方面要再做足先至有機會，但係呢個都係喺個checklist裡面。」

說到跑全馬的開心事，家謙指過去四次全馬有兩次是和家人及小朋友一齊去，還記得初馬太太和家人在終點等，小朋友仍然坐在BB車，但轉眼第二次在東馬時，他們已經大聲叫「爹哋加油！」，所以最開心就是在終點見到太太及小朋友。另外在馬拉松孤軍作戰時，沿途見到好多香港朋友，甚至聽到旁邊有人用廣東話打氣，就會「醒神晒」，特別開心。家謙又指跑步是快樂事，最多只是比賽前會有些內心掙扎，擔心完成不到賽事而已。

▲ 家謙指跑全馬最開心就是有太太及子女在終點等候。

家謙指跑全馬最深刻的體會是原來練得足夠與不足夠的分別很大，例如紐約馬之前，因為工作關係兩星期完全沒有練習，長課及強度課都不足夠，所以比賽跑到25公里，雙腳已經不是很聽話，反而今次東京馬拉松，由於練習不錯，所以去到30多公里仍然覺得力量充足。「跑步真係一個好老實嘅運動嚟，亦都解釋咗我點解咁鍾意跑步，同埋唔好信晒網上或者其他身邊嘅人講，好多人話紐約馬好難跑好多斜路好辛苦，唔好諗PB啦，但係跑完之後又覺得好似冇人哋講到咁辛苦咋喎！好多嘢都要親身經歷過先知道佢係有幾難，或者原來你係可以應付到㗎呢！」

▲ 家謙指紐約馬拉松沒有朋友所說那麼困難。

籃球是家謙一直以來的主要運動，但報名參加馬拉松後，「我又唔係好想搞咗一大輪，山長水遠去到跑唔晒或者跑得唔好，或者喺比賽前有甚麼意外發生，所以賽前會減少其他運動，打波都會少咗。」

兼顧家庭、工作及跑步方面，家謙坦言：「呢方面又唔係好困難，我覺得只要將自己生活裡面要做的事情排好優先次序，其實就好清晰。家庭及工作我一定會擺先，跟住就係跑步，其他無咁重要就可以拎走。以前我都係嗰啲成日無時間跑，『好攰呀、唔得啦』嗰類人，但有次在電話看到自己玩電話的報告，心諗如果將這些玩電話的時間拎一半去做運動，係咪可以更好呢？只要你夠想做一件事，其實係一定做到的！我好鍾意同小朋友相處嘅時光，好鍾意我做嘅工作，好鍾意繼續挑戰馬拉松，我就將這些都塞進我嘅日程度，好彩我的工作比較彈性，但又會成日通宵達旦，所以我會喺等接小朋友放學，又或者佢哋瞓晒時去練習，有時夜晚一個人喺跑馬地馬場兜16k tempo都好慘㗎，但當然都好多謝屋企的支援同埋太太的支持！」

家謙又指跑步或跑馬拉松和做人很相似，都是講求累積，而這個累積的過程相當漫長，要累積到一定程度才有結果，但過程中會有很多自我懷疑，要不看回報不看成績而要繼續不停努力，是有一定困難。「我覺得可以透過跑步鍛鍊到個人意志，或自己對生活的堅持。例如第一日走去跑咗成15分鐘，返嚟唔覺得有什麼分別，無快咗、身體無好咗、無瘦咗，好喇第二日再跑15分鐘，返嚟都一樣，第三日第四日如是，很多人都會選擇放棄，但其實你可以去選擇相信這個方法是正確而持續下去，你一日跑九個鐘頭係唔會令你進步，但係你每日跑20-30分鐘，連續九個月去做，你就會見到個進步，這個就是困難位，亦都是跑步吸引我的地方。」

▲ 家謙指累積訓練和堅持都十分重要。

家謙又很語重心長勉勵大家，跑步不會好像拍戲一樣，突然間變成超人般跑得很快，但只要肯每日累積一點，到某個時間例如比賽或做時間測試時，你就會發現自己在不經不覺下進步。「有時一開頭好辛苦，但係跑到差唔多完嘅時候，望返轉頭原來我已經跑咗咁遠，呢個係我自己對跑步最深嘅感受。好多人都會話10k是一個不能夠完成距離，半馬係冇可能，這個心路歷程其實每一個人都經歷過，相信無一個人會話『我一嚟就要全馬！』。其實每一個能夠跑完全馬的人，都是由換好對鞋落街跑的第一步開始，所以不要覺得你自己無可能做到呢件事，做人不應該為自己設限，只不過你是否會開始第一步，而去成就之後能夠做到的事情。」

▲ 家謙認為不要為自己設限，只要你想就可以。

家謙又分享通常喜歡跑步的人，如果當晚放棄訓練，第二天就會覺得「囉囉攣」，會怪責自己「為何會這樣？」反而若能戰勝引誘，跑到自己的想要的課表，滿足感就會很大，第二天就會開心地覺得「好彩有跑咋！」，特別是看到其他跑步朋友亦完成他們的訓練時候。所以家謙認為：「你只會後悔冇跑，好少跑咗後悔！人生苦短，你能夠盡全力去跑的日子其實不會很多，所以盡量不要讓自己後悔。」

▲ 「只會後悔沒有跑，很少會跑步後悔。」出自體育王子伍家謙的口中，自然成為大家的金句。

至於會不會跑山？家謙指屋企距離金督馳馬徑不是很遠，都有跑去大風坳，亦有試過港島徑全走，跑山路泥路亦沒有路跑那麼傷腳，上上落落又可以練習肌力，但目前未有想過會報名參加山賽，短期內會先集中完成六大馬的目標。「嗰陣時我都唔覺得馬拉松特別會吸引到我，day one都話自己一生都唔會參加馬拉松，但係而家又『中』咗個頭埋去，咁可能有一日山賽會吸引到我，或者我會好沉迷去玩都未定，所以唔敢講。」

家謙又指平時會在IG 或facebook story分享跑步，發現有很多想嘗試跑步的朋友會問他跑步問題，又或者在家謙比賽做pacer期間跟著他一齊跑，之後慢慢由10k跑到全馬的朋友，與他分享有關經歷，家謙希望日後有機會可以約這些朋友一起跑步，相信將會是一個開心的經歷。

作者_Clayton Lauw（劉茸）簡介:

跑齡10多年的傳訊公關，跑咗20個馬拉松，辛苦跑來志在食，所以易肥難瘦，每次增磅都係跑步的推動力，2020年5月有幸成為虛擬跑步比賽「Runner’s World HK V-Run 2020」男子公開組冠軍

更多跑呀跑，跑咗去邊？@Clayton Lauw的文章請按此。

如欲查看更多iMoney網上專欄的內容請按此。

即睇iMoney全新網站【 imoneymag.com 】

#即Like iMoney智富雜誌 專頁【設定為 搶先看/See First】搶盡投資先機！