母親節限定丨流爆家事！周家蔚遭細仔禁「暴露」 Bob爆女兒「反社會人格」

適逢明日（12 日）母親節，無綫推出特備節目《Mayanne 小喇叭加長版》，繼續由麥美恩（Mayanne）擔任主持、曾展望（GM）擔任助理主持，今晚（11日）8 點翡翠台播映。本集邀來三個家庭包括林盛斌（Bob）、洪天明及周吉佩（吉吉）一家大細，分享親子趣事，大談育兒經，有笑有淚勁溫情。

三個家庭輪流分享育兒經及親子趣事。

節目開首三個家庭先後「晒冷」騷 quali，小朋友輪流表演擅長才藝，Bob三女林機兒（Kaye）及孻仔林道申（Jaye）分別表演藝術體操同跆拳道；洪天明細仔洪竟琋（JT）表演體操晒真功夫，由大仔洪大仁（TJ）拉大提琴伴奏。吉吉則彈結他與仔女玩Jam歌，女兒周洛澂（包包）負責主唱，兒子周煥林（波仔）則擔任鼓手。

三個家庭輪流分享育兒經及親子趣事。

天明認同Bob講讓小朋友自行選擇喜愛的興趣，並非為咗滿足父母欲望，坦言唔認同太太周家蔚安排大仔表演大提琴：「我覺得呢個唔係佢強項，亦唔係學咗好耐，有時家長喜歡嘅嘢，無意間迫咗小朋友去做…要小朋友自己enjoy學嘅嘢，先pick up得好。」

細佬Jaye大耍跆拳道顯身手，身為爸爸嘅 Bob興奮大叫！

正所謂「童言無忌」，自然經常「語出驚人」！周家蔚透露JT係小管家，曾坦言唔接受媽媽衣著暴露：「佢唔畀我著泳衣，去水上樂園短褲都唔得。我問佢驚咩呢，佢話驚我cheat，每次阿仔管我，天明都喺後面笑！」吉吉太太Louise指波仔個性古靈精怪，令佢「唔知好嬲定好笑」：「有次我話記得提媽咪買漱口水，佢就話『我知，牙肉萎縮嘛，你都40㗎喇』，呢個係廣告slogan！」波仔即席神模仿廣告Tone，引發全場大笑。Bob藉此爆料指女兒越嚟越有反社會人格。一眾父母分享調停仔女打鬧絕招！

洪家兄弟檔演出，哥哥TJ拉大提琴，細佬JT表演體操。

之後Mayanne拋出「屋企邊個最惡」嘅「超．現實」快問快答問題，大部分子女投票覺得媽媽最惡，Pearl及家蔚均當選為「惡媽」；Bob不時與天明握手表達「I know that feel bro」心情，Mayanne更測試小朋友對父母有多了解，喺「默契大考驗」環節拋出「爸爸做咩最易激嬲媽咪」、「爸爸激嬲完點氹番媽咪」等，當中有小朋友踢爆爸爸愛玩手機，甚至有人嫌老婆「老」，究竟邊個咁大膽？

吉吉父子父女檔 jam 歌。

爆完一輪「童言無忌式」家事，子女親自DIY母親節卡送畀媽媽，更同爸爸親吻媽媽以表愛意，溫馨滿載錄影廠；爸爸亦藉此向太太發表愛的宣言，感謝她們一直以來無條件為家庭付出，當中天明嘅話令家蔚感動得熱淚盈眶：「其實佢比較想專注事業，但為咗我放棄咗，仲為咗我生小朋友，而我同其他家庭唔同，成日唔喺度，佢一個人好辛苦……我覺得佢真係好唔容易，真係要thank you媽咪。」身為一家之主嘅Bob為擔起頭家努力在外賺錢，佢感謝Pearl「一打四」將頭家打理得妥妥當當：「細路都好生性、好明白（事理），我就覺得（自己）點辛苦都值得。」吉吉則感謝Louise喺其每個人生低潮期均陪伴在側。

周家蔚同 Pearl被選為「惡媽」。Bob嫂承認高壓管教！Bob 爆料指女兒越來越有反社會人格。細仔嚴管家蔚衣著，原因竟然係擔心媽媽對爸爸不忠？！Louise分享波仔童言無忌經歷，仲即場示範，引得主持們大笑！細仔 JT撐腰模仿媽咪，相當搞笑！Bob感激太太教仔女教得好。天明發表愛的宣言，令家蔚感動到眼濕濕。三女林機兒（Kaye）和孻仔林道申（Jaye）一齊錫媽咪。吉吉激動擒上太太度獻吻！