政Whats噏：51歲方國珊自稱「待字閨中」？

曾經5次參選立法會選舉都落敗嘅西貢區議員方國珊，本月底即將踏入52歲，佢早前透露自己度過咗20多個單身情人節，大讚單身都唔錯，又自由，仲大爆即使前度曾求婚，佢都想做嘢為主。不過，方國珊今日(15日)出席電台節目時，突然自稱「待字閨中」，唔通喺新界東補選落敗後，政壇失意，愛情得意，就嚟嫁人？

原來方國珊呢個「待字閨中」，係指希望加入新政黨，覺得依家嘅建制政黨都係盲目保皇，唔會加入；如果新政黨有好嘅民生理念同政治魅力，佢會考慮加入，因為獨立議員嘅資源好困難，自己今次補選落敗係「輸黨無輸人」喎！睇嚟依家入黨係方國珊「對的時間」，希望佢都遇上「對的人」，嫁杏有期啦！

目前立法會仍有兩個議席出缺，包括新界東，相信都要有第二輪補選填補空缺，方國珊就透露，正考慮再參選，即係第6次參選立法會選舉。佢又認為，應該容許遭取消議員資格嘅社民連梁國雄重新入閘參選。不過，佢覺得搞補選勞民傷財，應設立替補機制，有議席出缺時，就由得票排喺後一位嘅人補上，而當選議員連任應設上限，最多只可以做兩屆。