【公務員辛酸史】一位聲稱為前女房屋事務主任的自述 分享作為公務員所面對的壓力及職場欺凌 (Sharing from ex-housing officer) ...... !

眼見好多waiting list的bro/sis渴望入房署做HO，以下是個人經歷，希望可以比各位作參考：

本身大學讀物業管理，出黎做建築行業(只做過幾個月物管)，2016年10月已收到房署offer (當時HO interview 仲未完)，12月頭正式入職，人工減左萬幾蚊(連雙糧花紅計)。


諗住入到政府好好做，女人搵錢唔使多，最緊要生活無憂，無壓力，無workload，得閒研究下養生，點知原來唔係果回事，workload大都算，工作難極都有個限度，但D阿姐真係超惡頂，平均入房訓話的次數每日至少逹3次，每次不少於45分鐘，不但疲勞轟炸，仲要恐嚇你，話你唔適合份工(入職才1個多月時)，未達標，會寫花你report，入到黎唔代表一定穩，etc. 開頭聽到都會有壓力，情緒同精神會受到困擾，後來慢慢地無晒感覺，由佢發up瘋。傳聞有前房屋事務主任比佢逼到跳樓(死左)，有師兄晚晚做到十點幾都成日比佢罵到哭，亦有好多要求調職。

跟住會諗，減人工入到黎都唔知為乜，無一樣比得上外面私人市場，我曾經好想入政府，但試過後對政府機構已經死心，而家係出面薪金跳返上三萬幾，自由度好大，工作氣氛舒適，零OT，比在房署輕鬆左好多。

真心奉勸各位想入房署的師兄師姐諗清楚，入面D阿姐真係會以為你無左呢份工唔得，你入到黎等於中左六合彩頭獎，佢地講野好尖酸刻薄(咁老好心就積點德，厚道少少啦)，EQ自問無咁高的就唔好入去了，除非你好smart。

PS: 政府聘請合約裏面寫明可以減人工，表現欠佳者可以解僱，亦曾有confirmed的公務員比人炒，穩定已經唔再係一個優勢，本身條件不錯、有市場價值的人留返係私人市場好過。


資料引自 : 討論區