【非廣告】CV應該用word檔定係pdf檔? 為咗保障自己,正確嘅做法應該用pdf檔,一來係word檔有可能因為唔同原因而導致走位,二來係對方嘅版本亦隨時會自動underline你打錯嘅字,咁當然啦,用咩檔都好,CV串錯字係大忌,最重要都係檢查清楚先send出去,只係盡量避免word檔突顯出錯處啫。 有啲招聘廣告會叫求職者用word檔,唔好用pdf,通常呢啲都係獵頭公司,原因不外乎要執一執你份CV先畀個客,呢個係工作嘅一部分,遇到好嘅headhunt仲會幫你執得再靚啲,例如打段非常正嘅summary,再highlight兼粗體埋CV裡面嘅關鍵字,而其實headhunt執完之後,都係會轉返做pdf檔send畀個客,除咗唔想啲字走位之外,更加唔希望有啲衰客私自改嘢。 總而言之,send去一般公司用pdf檔比較保障 (如果間公司連pdf檔都開唔到就執Q咗佢啦),如果send去畀獵頭公司,就可以用word檔方便佢哋幫你執,而其實word又好,pdf都好,一樣可以經網站幫你轉檔,可參考呢個 https://smallpdf.com/word-to-pdf (非廣告,冇收錢),不過太複雜嘅pdf檔喺轉word檔時都有機會見到啲字走位,記住check清楚先send出去。 至於CV嘅file名,呢度都想講一講,10封有7封都係用CV或Resume呢類字眼做file名開頭,可能係你download個格式落嚟已經預設咗,又或者方便你喺自己部電腦度搵出嚟,不過HR同headhunt一日收咁多,佢哋部電腦save咗一千幾百個用CV或Resume做開頭嘅file,有時記起你都未必搵到,因為喺公司電腦個drive撳F5 search一個字,隨時掃瞄到天荒地老,試下用你英文名做file名開頭,例如david_ng_resume,如果對方真係對你有印象,搵你份CV出嚟都快好多。 3號風球冇心機做嘢,咪執執份CV睇下有咩好工囉......