何遠東決心減肥 靠運動及控制飲食3個月極速減30磅

入行12年嘅「肥東」何遠東 ，近年憑《降魔的》及《心理追兇Mind Hunter》等劇集發揮超水準，演技獲得觀眾認同。其實除咗佢精湛演技吸引觀眾外, 圓碌碌嘅身型亦令人印象深刻。近月因疫情問題，佢工作量減少，於是趁機就開始積極減肥。早前佢已經喺社交網站上載照片，相中嘅佢瘦咗20磅。前日佢又上載咗張空中瑜伽相，佢又比之前減多咗十磅，即係總共勁減30磅。

何遠東喺3個月內極速減去30磅，雖然都係靠運動，但過程亦非常變態，佢每日踩一個鐘頭健身單車，之後會睇健身片跟住做，例如Sit-ups及Plank等等。減到磅嘅同時，身體亦健康咗。而飲食方面，佢都下咗唔少苦功，以前一星期食一大包薯片，而家一個月十片，雪糕都食少咗，不過佢都未能完全戒口，只係比以前食少咗。 體重最高峰時達240磅嘅何遠東接受傳媒訪問時話目標係減多10磅，希望可以喺呢個9月內完成。

成功減磅相片出街後，唔少藝人朋友都紛紛留言，好似有黃智雯：「縮水東東❤️」、呂慧儀：「瘦咗好多啊🤩」、洪永城：「用邊個app整到咁瘦㗎?」、胡定欣：「邊個黎架？😃」及楊秀惠：「😱😱😱請問這位帥哥是誰😍」等等。另外，唔少網民都有讚何遠東瘦咗好多，但佢笑言自己只係由五花腩變半肥瘦。網民留言大讚佢:「就嚟何遠東變咗何潤東！」、「變咗韓國oppa」、「咁仲係咪叫「肥東」？」、「麻煩請你改返ig個名⋯⋯⋯你涉嫌違反ig網名說明條例!」及「嘩！瘦左好多呀！👍👍」等等。