獎門人曾志偉踏入生日月驚喜收蛋糕 梁競徽最想同陳展鵬啜啜

4月14號就係獎門人 曾志偉 嘅71歲生日，慶祝活動一定浪接浪，呢晚志偉先同一班獎老 阮兆祥、錢嘉樂、麥美恩、林秀怡、林政峰仲有兩組嘉賓包括《逆天奇案2》隊嘅 陳展鵬 Ruco Chan Rosina Lam 林夏薇 Crystal Fung 馮盈盈 劉佩玥Moon Lau Alex Fong 方力申 張頴康 麥雅緻 高鈞賢 以及 梁小冰 ，對戰《兄弟姊妹隊》嘅 朱咪咪 袁偉豪 Benjamin Yuen 張振朗 Owen Cheung 梁競徽 郭政鴻 陳煒 Alice Chan 同 范振鋒 。

喺錄影節目《獎門人hug hug媽咪感謝祭》後，大家齊齊為獎門人預祝生日送驚喜，令佢感動又開心。志偉表示雖然生日正日未到，但踏入生日月已不斷有慶祝活動，會分批同朋友食飯，而呢晚係佢食嘅第一個生日蛋糕，感激大家心意。

至於提到生日願望，志偉就話：「年年都一樣身體健康，多謝大家支持TVB，獎門人接近30年，得到觀眾一直支持好開心。」志偉又大讚呢晚嘅嘉賓玩遊戲識搞氣氛，尤其感謝朱咪咪專誠由外地返港參與節目。

呢晚逆天隊除咗藝員玩遊戲之外，劇集監製劉家豪同太太梅小青都有撐場打氣，令藝員們信心爆棚，擔任隊長嘅展鵬雖然將一切交畀隊友，但就笑指要派出劉佩玥做秘密武器，叫佢除外套玩遊戲色誘對手。而薇薇就覺得啜乒乓波最難，因為每次都食風，之後會胃痛。

至於對家嘅袁偉豪、梁競徽、朱咪咪、郭政鴻未出場前已經高呼口號，「我哋係豬隊友，東南西北都會有。」並分別以豬東、豬南、豬北以及咪咪姐自稱係「朱西」，令大家回憶當年佢喺電影《唐伯虎點秋香》中嘅經典角色。更加估唔到嘅係咪咪姐話啜乒乓波環節預咗獻出初吻，但有感對手太後生，竟然要求對象係同胡楓。競徽就表明想同展鵬親嘴，因為兩人曾經拍劇四目交投都嘴唔到，被咪咪姐取笑佢開始鍾意搭飛機。

#獎門人hughug媽咪感謝祭 #曾志偉 #阮兆祥 #錢嘉樂 #陳展鵬 #林夏薇 #馮盈盈 #劉佩玥 #方力申 #張頴康 #高鈞賢 #梁小冰 #朱咪咪 #袁偉豪 #張振朗 #梁競徽 #郭政鴻#陳煒 #范振鋒 #唐伯虎點秋香 #麥美恩 #林秀怡 #林政峰