龍哥再現《兄弟幫》為爆喊解釋　強調冇呃神騙鬼：我做人憑良心

龍哥 (杜慶龍師傅) 之前在無綫節目《Big Boys歷險記》中為亡靈超渡，期間疑因亡靈附身而神色異常，情緒激動，片段播出後引起好大迴響，有不少人質疑龍哥言行的真確性，甚至被指造假，而他之後在該節目的其他片段亦全被抽走。昨晚在播出的《兄弟幫》就請來了龍哥親自剖白對這些負面評論的睇法，為突然情緒變異一事解畫。龍哥表示：「當時亡靈想多謝攝製隊，我話禮多人不怪，點知我答應後就隨即上咗我身，我都預料不到。你知我一向比較靚仔，但突然呢一幕就咁樣公諸於世，我都不想人看到我淚流滿面。我唔知會出現呢一幕，連我自己都好驚訝，大佬，十幾人在現場睇住，你喊畀我睇吖。」主持王子軒亦表示要在一秒間變成這樣，就算是演戲都好難演到，又謂龍哥並非演員，若是演出這一幕應該可以攞獎的了。

之後龍哥又一再強調自己絕非呃神騙鬼：「我又不是惹事生非，不是呃神騙鬼，我咁做有咩好處？我只是想超渡亡魂讓它們可以投胎。正所謂呃得到人呃唔到神，如果拍攝一個節目我喺度胡說八道，舉頭三尺有神明，唔通我可以隻手遮天咩？我呃神騙鬼唔通我不用負責任咩？我咁做有咩好處？我做人憑良心做事。」還揚言信不信由大家自行決定。