【MPF大變天】MPF橫空出世 話你知

有一單新聞，大家可能無乜留意，連傳媒都好少報，就係積金局推行電子平台，叫做積金易，eMPF。官方講法就係將現有強積金系統既行政程序標準化、精簡、自動化。因為現時有14個供應商用緊12 套不同的系統，而且每年有約3000萬宗mpf行政交易，當中約65%仲係用緊實體表格。所以推行電子化勢在必行。

基金行政系統、基金交易系統是指一般用來給供款人下單作基金買賣轉換的平台，以及處理基金買賣的系統。建構一個統一的電子平台的好處，積金局係過去一段時間都講左好多次。

仲有一樣，積金局一直以來都做既，就係挑動一般市民對強積金收費的不滿情緒，從而比壓力供應商，減少強積金既收費。可以減少收費一定係好事，但由積金局牽頭，將現有各個供應商既基金行政系統，平台集合為一，由一間公司做晒，積金局其實想做乜？

實際上想做既，就係集權。

講返一下現在的強積金市場情況，現時強積金由trustee受託人作為供應商，每一供應商可擁有一個或多個強積金計劃。供應商除咗幫你搵基金公司去投資你啲mpf基金外，佢仲會比個方法（包括電子介面或紙張表格）你去處理你的買賣基金指令。佢個系統有問題，介面hang 機，都會令你入唔到指令轉唔到基金。而且咁多間供應商有中資，有外資，有港資，你唔鍾意這間可自己轉去另一間，這間會死機，死買賣系統，你可以轉用另一間。

現在強積金收費平均約1.45%，你比既基金管理費其實分左好多部分，比唔同單位。其中最大部分就係比左受託人費+行政費，約0.5 %到0.7%以上。比左這個收費，咁想有得揀下邊間個系統好唔會死機，都好正常。

積金易係做d乜？積金局就係睇住受託人收費佔基金收費內最大部分這點，打算招聘一間公司，承包晒現在咁多間受託人既行政系統，做出一個統一的平台。即係往後不論你買左邊間強積金，你都要先登入左empf個系統，再係入面揀用乜強積金計劃，買乜基金。統一之後，希望能得到更大的經濟效益，預計可以令受託人收費最多減低0.2%。但用家們就對系統，無再有得揀。個系統點設計，有冇人對某供應商特別照顧，這我們全都無say。

但推行左eMPF後，政府一集中左用同一個系統，萬一死機，大家都企左係度。即係最後出來的系統有乜問題，幾難用，我哋都要硬食，我哋想揀都無得揀。mpf行政費平定貴，包埋落單買賣系統好定唔好，到時服務唔再係我哋可以選擇既一個因素，因為無得揀。

仲有私隱問題

Empf實行之後，負責行政系統果間公司-積金易平台公司是積金局的全資附屬公司。供款人既資料最後會去到邊度，果間積金易平台公司第時點做資料保護去保障個人私隱，真係要睇清楚。而且以後政府對你有任何意見，對你的強積金有什麼特別安排，佢都唔需要再一間間供應商去通知。

年初積金局為可在積金易平台公司營運行政工作既公司開始招標。咁大茶飯，好多間公司都有興趣，話晒winner takes all，可以一統行政平台的江湖。而且mpf 個個月每個打工仔都要供，整體金額只會不斷上升，受託人費，行政費，每年只有增無減，而且無論回報賺蝕，受託人也袋袋平安。

中銀，銀聯，以及永明都對招標表示興趣，但最後在積金局完全唔公開選擇條件下淡然出場。結果2間完全無mpf經驗的公司進入最後名單。

平安保險旗下的金融壹賬通所牽頭的財團以及電訊盈科牽頭的財團進入最後名單。用現時強積金的資產值估計，中標者每年收入可達34億，而這個數隨著mpf資產值年年上升，中標財團收入只會不斷增加。入左圍既2間公司都唔係泛泛之輩，各有各背景，各有各力場。

一個大肥缺，一手掌握全港打工仔的強積金平台，買賣基金連個人資料都掌握，篩選條件過程係完全唔透明。新系統上馬後有什麼問題，什麼混亂，香港人硬食晒。

大家每月供mpf,夾錢慶祝中標者。