許廷鏗首次為Viu做主持嘅新節目《AH佛真.惜玩》噚晚播出,佢請嚟多位嘉賓包括林二汶、林欣彤、林師傑、陳健安、謝安琪及黃夏蕙等擔任嘉賓,以各種嘅挑戰帶出人生思考嘅課題同埋活在當下嘅訊息。第一集佢請嚟66歲嘅賈思樂(Louie)亮相,兩人年紀相差一倍,但透過一齊玩遊戲,令Louie感受青春。 賈思樂喺節目入面話自己想接觸一啲後生嘅production、後生嘅主持人,佢知道許廷鏗係歌手、牙醫,佢講笑今次參與節目隨身帶備藥油,以備暈咗;而佢先同許廷鏗玩小型賽車,結果勝出,佢話係對方讓賽,許廷鏗就話「我都想講係讓嘉賓,但我確實好努力,冇讓過你。」之後許廷鏗考Louie潮語,問佢有冇去過連登?Louie真係唔知:「連登係咩?我諗起燈籠。」經牙醫解釋後,Louie就知連登係個網上平台,仲學識潮語「GG」(收皮)同「1999」(一嚿嚿),佢話可以同同齡嘅晒下識潮語,「今日上咗好寶貴一堂,同young generation一齊,大開眼界。」 許廷鏗同賈思樂又合力玩遊戲,要喺六分鐘內完成任務,其中一項係彈馬紙射汽水罐,未玩過彈馬紙嘅許廷鏗有啲手忙腳亂,賈思樂就喺旁邊不停鼓勵,雖然比賽輸咗,但兩個都玩得好開心。賽後許廷鏗話,「我覺得佢心境年齡同實際年齡有啲唔相符,換衫時佢喺隔離廁格,我同佢講話其實你生得我出,我33,佢66,啱啱一個double,我諗如果我活多一次人生嘅呢一段路,我能唔能夠保持到佢咁young呢?我係有啲懷疑。」賈思樂不嬲比較樂天,佢覺得無論係青春派定係老人派,enjoy一樣嘢就真係去enjoy過程,贏輸唔緊要,最緊要開心。 圖片:Louie Castro 賈思樂 fb|ViuTV capture 許廷鏗 Alfred Hui ─Follow us: ●MeWe:https://bit.ly/33lWxDh ●IG:www.instagram.com/smartposthk