歐聯五福臨門　夏蘭特成史上第3人

最強博彩盤路過關神器《串績王》：http://win.on.cc/football/　

曼城前鋒艾寧夏蘭特喺歐聯16強次回合對RB萊比錫，轟入5球，唔止成為賽事史上最快及最年輕累積入30球嘅球員，同時亦係史上第3位單場歐聯「五福臨門」球員，同阿根廷球王美斯及巴西前鋒雷斯阿祖安奴睇齊。

翻紀錄查，美斯係歐聯史上首位「五福臨門」球員，佢喺2012年3月歐聯16強次回合對利華古遜，射入5球，協助巴塞隆拿大勝7比1。

去到2014年10月歐聯分組賽再次出現「五福臨門」球員，當時效力薩克達嘅雷斯阿祖安奴對白羅斯球隊巴迪，射入5球，該仗薩克達贏7比0。

相隔超過8年之後，艾寧夏蘭特成為歐聯史上第3位創出「五福臨門」壯舉嘅球員，與此同時，呢位挪威前鋒今季各項賽事已經5次上演帽子戲法，繼2016/17年球季熱刺前鋒哈利卡尼之後，再有英超球員單季5次「戴帽」，曼城今季仲有多場比賽，艾寧夏蘭特單季「戴帽」次數勢必再增加。