朱鑑然重拾泳手身份　首度於維港暢泳

藝人朱鑑然（Kevin）今早（23日）以大使身份出席維港泳活動，身為前香港游泳代表隊成員的他，原來是首次於維港游泳，他説：「細個成日聽爸爸講爺爺喺維港游水嘅事。（有冇同爺爺游過？）冇呀，嗰陣唔知係咪可以隨便跳落維港呢？」向來有參加泳池比賽的他，表示早前也特意到海灘落水感受一下：「因為最近工作都忙，練習時間並唔多，不過今次游完真係好感動，我仲同阿媽講我游水過海添，哈哈。」

近年參演多部電影作品的他，直言暫時算是入行以來最忙一年，問到工作與家人之間如何分配時間？他說：「同屋企人關係都好好嘅，阿媽好識做，見我忙就會問『煲咗湯飲唔飲呀？』，我就緊係話飲啦！嗰晚就會返屋企食飯飲湯，有時做嘢唔得閒媽咪仲會攞過我屋企畀我飲，好感恩有屋企人嘅支持。（咁有冇時間拍拖？）未有閒餘心機時間去諗呢樣嘢。（搏殺工作唔拍拖住？）都係㗎，如果有感情生活好可能會影響工作情緒，又擔心到時掛住做嘢忽略對方。」仍有數部電影未上映的他，表示即將為本地電視劇開工，但詳情暫時未能透露。