重奪英超重臣李凱怡 為費格遜捧曼聯

昨晨遇電訊盈科電視及新媒體業務董事總經理李凱怡（Janice），她正與傳媒好友茶敘。去年底喜訊傳來，電盈旗下nowTV重獲英超轉播權，八卦的黛安收到消息，電盈這一、兩日會正式簽約，難怪Janice春風滿面。

now早於07至10年間曾轉播英超，今次重奪轉播權，除提供380場高清播放，據悉亦增加不少增值服務：例如未能於開波時準時回家，可透過「nowplayer」隨身觀賽，或以「now Record」功能，用手機遙控即時將節目錄起；又或者趕返屋企之後，啟動「Timeshift」功能，將球賽play back至開場時間。當然，你亦可於事後足本或重點重溫，保證無機會錯過任何一分鐘。

開台猛將愛睇波

多咗咁多貼心服務，但價錢唔係調整好多，73個台連16項自選服務，月費398元。

據悉，今個月內簽30個月合約，仲免收半年月費及接駁費，每個月可慳番80元。講番Janice，佢可謂now的開荒牛，對now的成功貢獻良多。她03年加入電盈幫now開台，三年後接掌電視及新媒體業務，現時主管項目包括now寬頻電視及MOOV數碼音樂服務，管理1,500名電視台職員。

外表溫文爾雅，原來Janice都鍾意睇波，仲話自己捧開曼聯，但迷到伊人嘅並非球員，而係領隊費格遜。六年前now奪得英超轉播權時，Janice曾遠赴英國簽約，當時佢去咗曼聯嘅主場奧脫福球場，造訪費格遜及一班球星。

費格遜專業又好人

Janice話平時喺電視見費格遜，覺得佢好cool，但傾落先知原來對方又nice又專業，對球員好似爸爸一樣，教佢哋除咗場內表現好，場外應對公眾傳媒都要笑面迎人，自此Janice便變曼聯擁躉。Janice又大讚英超愈來愈好睇，以前只有「Big 4」，而家增加到「Big 6」，刺激性大增。