【A&M Diary】回歸前嘅香港曾有「東方直布羅陀」之稱，今日嚟到直布羅陀（Gibraltar）卻有幾分昔日香港嘅情懷。直布羅陀係英國14個海外領土之一，面積比香港嘅油尖旺區仲要細，但因為位於西班牙伊比利半島嘅南部，對岸就係非洲大陸，所以充滿戰略地位。至於嚟直布羅陀旅遊，就一定會登上直布羅陀巨巖。
提提你
1. 直布羅陀巨巖上居住咗唔少直布羅陀獼猴，餵飼直布羅陀獼猴係違法行為
2. 直布羅陀獼猴以為所有膠袋入面都有食物，所以唔好帶膠袋上直布羅陀巨巖，避免直布羅陀獼猴搶走
3. 喺直布羅陀巨巖上嘅纜車站設有餐廳，而部份景點設有洗手間，但洗手間數量唔多，見到就去咗先
4. 大家記住保持環境清潔，自己垃圾自己帶走，絕對唔可以破壞大自然環境
5. 直布羅陀巨巖上有唔少歷史遺蹟、自然風景，大家遊覽時候記住要愛護歷史同保護環境
6. 直布羅陀巨巖嘅路況唔難行，但各景點都有一定嘅距離，所以大家記住要量力而為
前往方法
1. 纜車：⼀般遊客都會乘坐纜車登上直布羅陀巨巖
2. 租車：直布羅陀巨巖上嘅各個景點分佈較遠，租車絕對係最舒服嘅旅遊方法
3. 步行：直布羅陀巨巖高426米，如果時間充裕，步行其實係最佳嘅旅遊方法
1. 直布羅陀巨巖景點：纜車站
由直布羅陀市中心坐5分鐘左右嘅纜車，就會登上直布羅陀巨巖。喺巨巖上嘅纜車站，設有餐廳同洗手間，大家仲可以去到纜車站嘅天台，欣賞直布羅陀巨巖、直布羅陀市中心、直布羅陀海峽等景色。
2. 直布羅陀巨巖景點：Sky Walk
Sky Walk前身係二次世界大戰期間嘅軍事制高點，因為呢個地點可以360度環觀歐洲、地中海、直布羅陀海峽、非洲大陸、大西洋等地方。依家經過活化之後，打造成一個玻璃底嘅Skywalk，風景非常遼闊之餘，仲絕對考驗大家嘅膽量，挑戰懼高心理。
3. 直布羅陀巨巖景點：St. Michael’s Cave
St. Michael’s Cave係直布羅陀巨巖上最大嘅洞穴，配合唔同嘅燈光同音樂效果，令鐘乳洞更有特色，當中要數最靚最震撼就一定係The Angel of St Michael’s Cave，直係非常壯觀！至於St. Michael’s Cave除咗為觀光性質嘅鐘乳洞之外，喺二戰期間更曾改建用作緊急軍事醫院。另外，因為洞穴內獨特嘅音響效果，St Michael’s Cave更會作為音樂會、直布羅陀小姐等等嘅表演場地。
4. 直布羅陀巨巖景點：Windsor Suspension Bridge
Windsor Suspension Bridge全長71米，建於50米深嘅峽谷之間，連接吊橋兩邊嘅炮台，喺吊橋上可以睇到整個直布羅陀市中心同直布羅陀海灣嘅風景，絕對係直布羅陀巨巖嘅打卡熱點！
5. 直布羅陀巨巖景點：Apes’ Den
要數直布羅陀巨巖上，最具代表性嘅居民，當然就係直布羅陀獼猴啦！直布羅陀獼猴共有300隻，分為5個族群，係歐洲唯一嘅野生猴子種群。由落纜車開始，就會見到唔少直布羅陀獼猴，直布羅陀獼猴非常為食，所以大家唔好一路行一路食，如果唔係就會成為直布羅陀獼猴搶食嘅目標。
6. 直布羅陀巨巖景點：Great Siege Tunnels
直布羅陀喺1704年成為英國殖民地之後，歷史路上一啲都唔易行，因為位於地中海戰略要塞嘅地方，所以成為各國兵家必爭之地。英軍為咗守護呢個地方，喺直布羅陀巨巖內挖掘軍事洞穴同隧道，其中Great Siege Tunnels超過30公里，以直布羅陀巨巖作為掩護，並放置大炮攻擊侵略者。
7. 直布羅陀巨巖景點：Military Heritage Centre
想更深入了解直布羅陀歷史，可以去到Military Heritage Centre。喺呢個小小嘅博物館入面，可以睇到18世紀嘅炸藥同砲彈等武器、軍事遺物，以及直布羅陀軍團嘅紀念室。
8. 直布羅陀巨巖景點：WWll Tunnels
軸心國嘅德國同中立國嘅西班牙一直都對直布羅陀充滿興趣，所以英國首相丘吉爾喺二戰開戰前就大規模修建直布羅陀巨巖內嘅軍事隧道。呢條WWⅠⅠ Tunnels全長52公里，並設有儲存區、補給站、醫院、軍營等設施。
9. 直布羅陀巨巖景點：Moorish Castle
直布羅陀嘅常住人口只有3萬幾人，主要為英國同西班牙人嘅後裔，另亦有少數嚟自北非一帶，被稱為摩爾人嘅穆斯林。摩爾人喺8世紀嘅時候建立Moorish Castle，當時Moorish Castle主要為守護用途，依家就成為直布羅陀嘅地標之一。
10. 直布羅陀巨巖景點：觀景台
喺直布羅陀巨巖上有唔少觀景台，大家可以喺唔同角度欣賞直布羅陀市中心、歐洲大陸、地中海、直布羅陀海峽、非洲大陸、大西洋等地方。而位於直布羅陀巨巖Military Heritage Centre附近嘅觀景台就可以睇到直布羅陀機場，呢個機場嘅最大賣點係人、車同飛機共用跑道，而位處直布羅陀巨巖上，就可以睇到飛機升降喇！不過，直布羅陀機場嘅航班班次唔多，想睇飛機升降要就啱時間喇！
