攝影是一種興趣，也是一門藝術，是攝影者透過影像，跟大家傳遞各種訊息，就好像講故事一樣。對鄭文雅來說，攝影不止是她的興趣。攝影，充實她的生活，豐富了她的人生，對她的婚姻更起了化學作用。今年是鄭文雅和虞哲揮結婚20周年，一段經得起考驗的婚姻，是建基於互愛互信，鄭文雅認為珍惜就是一條開啟快樂之門的鎖匙。新世代婚姻鬥智鬥力，離婚互片互插，令她有感而發，她勸喻一眾癡男怨女，calmdown！　撰文：楊潔雯

好學不倦，積極上進是鄭文雅的座右銘，她不會放過任何攝影機會，為了拍攝傳統客家茶果手工藝，哪怕黃色暴雨警告生效，日前她闖入粉嶺一個山村小鎮，採訪大嫂製作客家茶果的絕密過程，再參觀村內的百年古宅。

周遊列國拍拖獵影

右手拿着專業相機，腰間掛滿長短鏡頭，鄭文雅在狹窄的小屋內，搜尋每個最佳角度，她對客家人的傳統文化非常好奇，她突然對着大嫂吐出一句客家話，大家都感到意外，她說：「我都係客家人，之前食過你啲茶果，好好食呀！」然後，她吃着雞屎藤茶果，講起攝影，講起藝術，講起20年的婚姻。
鄭文雅與丈夫就像國家地理雜誌攝影記者一樣，不怕艱辛，遊走各地，習慣將最珍貴的影像拍攝下來，她說：「我20幾年冇停過影相，我去過好多偏僻地方，例如巴基斯坦、黎巴嫩、敍利亞嗰啲地方，我去影當地嘅風土人情，呢啲地區歷史悠久，仲有一啲未被破壞嘅歷史遺物喺度。」

高山險死共度患難

遇到一位志趣相投的朋友不容易，能夠結為夫婦更難上加難，鄭文雅是個幸運兒，她說：「其實我老公好細個已經識影相，我識佢之後開始影相，有時佢會陪我周圍影相，佢好多嘢都好support我，咁樣係好好嘅。」
鄭文雅和丈夫周遊列國，攀山涉水，目的就是為了拍攝珍貴的圖片，在旅途中，夫妻要互相扶持，面對逆境，她說：「影相咁耐，我最鍾意喺高山影相，因為係好艱難先見到嗰啲光線，山上面嗰種寧靜，嗰種靚，喺水平線睇唔到。不過嗰次去到高山，我高山反應好嚴重，食藥都唔得，就喺3,800米我就出事，我記得我當時係一路嘔，一路流住鼻血咁落山，好似成個人死咗咁，我老公都有少少高山反應，但係就算佢幾頭痛都好，佢都要照顧我，所以我嗰時就有相依為命嘅感覺，新地方，陌生環境，要互相依賴，互相提點，咁樣感情都會好啲。」

力勸鋒芝珍惜緣份

20年婚姻得來不易，沒有小朋友的連繫，隨着時間的過去，夫妻間的感情卻有增無減，互相尊重和懷着感恩的心，是鄭文雅和虞哲揮愛情長跑的要訣，她說：「好多嘢佢唔support我，我做唔到，同埋好多時佢係第一個畀意見我嘅人，我覺得樣樣嘢要互相鼓勵，幾十年夫妻話長唔長，話短唔短，但係我會珍惜，每一段大家喺埋一齊嘅時間。當你識得珍惜，你就會將佢嘅弱點睇得好細，甚至覺得呢個弱點唔再重要。」
速食文化大行其道，連戀愛都一樣，可以用完即棄，哪有珍惜可言？鄭文雅眼看年輕一代的婚姻觀念，最近謝霆鋒和張栢芝的家庭糾紛，令她不禁搖頭嘆息，她說：「好似最近嗰啲娛樂圈新聞，搞到咁樣唔係幾好囉！Calmdown，可以喺埋一齊係一種緣份，能夠喺人海相遇，梗係有啲嘢，要你兩個喺埋一齊，一定要珍惜，唔可以因為其他無謂嘢影響大家嘅感情。」

半裸寫真　「家都冇人做到」

鄭文雅鍾意旅遊，探討各地風土人情；喜歡陶瓷、雕塑，展現自我和創意一面；熱愛攝影，想記錄一切關於自己和有藝術性的人和事。鄭文雅願意為藝術豁出去，25年前半裸拍攝《鄭文雅寫真集》，由著名攝影師KevinOrpin操刀，大獲好評。

「好彩嗰時做咗」

舊事重提，鄭文雅對自己的敢作敢為仍然自豪，她說：「我覺得我好彩嗰時做咗，嗰時後生身材好，不過我又唔覺得好特別，呢個係一種裸體藝術。嗰次因為實在影得太好，好有藝術性，根本到家都冇人可以做到。」
鄭文雅認為裸體是藝術，但有人會視作色情，藝術和色情只是一線之差，她說：「油畫、畫畫喺幾百年前已經有裸體藝術，只不過係香港人故步自封，我覺得有啲人喺文化上嘅虛偽，影響人哋嘅創作。」
鄭文雅是藝術家，香港電影金像獎的雕塑女銅像就是她的大作之一，對於自由創作被壓制，裸體藝術被誤解和忽視，她感到失望，她說：「唔通大衞像擺出嚟係要遮住，有啲裸體雕塑，好似羅丹嘅作品，直情係激情，咁人哋擺喺博物館，唔通要全部用黑布遮住佢？即係我接受嘅嘢係同一般人唔同。」

出攝影集　宣揚戲曲文化

這本記載戲曲發展，承傳戲劇文化的攝影集《文情雅戲》，由鄭文雅親自操刀，她形容自己就像一個獵人，遇到瀕臨絕種的動物。由香港影到北京，拍攝國家一級演員在台前幕後的一舉一動，是一次絕無僅有的機會。
鄭文雅說：「最初係我知道新光戲院拆，想影啲有紀念價值嘅相，喺度撞到李居明，知佢有一齣戲喺北京，三套劇，京劇、越劇同粵劇都一齊做，咁樣好少出現，佢問我有冇興趣影，我梗係有啦！」

捐往大學圖書館

鄭文雅跟隨劇團到北京，穿梭在戲棚之間，捕捉每一個戲劇大師，妝前妝後，台前幕後各式各樣的神態，她說：「我知道尤其係京劇演員，未必會肯畀你影，所以今次我可以由佢第一筆化妝開始，到上台表演都可以影到，真係好難得。」
機會難逢，更難得的是引起同行共鳴，鄭文雅說：「返嚟之後，一啲戲行嘅人睇到我啲相都覺得正，佢哋都覺得我應該做啲嘢，所以先至有呢本《文情雅戲》，而我決定出，唔係話淨係想出一本書，我係想本書可以宣揚到我哋中國戲曲文化，呢個先係最重要。之後我會捐呢本書去中學同大學嘅圖書館，等年輕一代認識我哋偉大嘅中國文化。」