婚後事‧獨家｜陳自瑤與前夫羅子溢床戲掀熱話 爆與黎諾懿挑戰更大尺度極度緊張

陳自瑤yoyo 同 羅子溢『羅仲謙』Him Law 主演TVB劇集《婚後事》話題十足，其中Yoyo同子溢和平離婚後，Yoyo對前夫餘情未了，竟然喺告別前，主動要求子溢作最後床上溫存，呢個劇情意識破格，連畫面上都挑戰電視尺度，講起呢場咁激嘅場口，Yoyo多謝經驗豐富嘅子溢幫助入戲，令佢拍得好安心。

Yoyo笑稱子溢十幾二十歲就開始拍親熱戲，絕對係老手。Yoyo話：「如果對手唔係子溢，我心理壓力更大。」子溢喺現場拍攝時，為咗緩和氣氛，特意播放Yoyo鍾意嘅音樂，令佢可以放輕鬆，從中建立互相信任，仲話：「女性最緊要係唔好走光，所有嘢我事前會同Yoyo講，包括會掂到佢邊個部位，錫到邊。」Yoyo亦大讚對方專業。

另一幕Yoyo同黎諾懿池中嬉水戲都係劇集亮點之一，兩人進展令觀眾有所猜疑，不過Yoyo反而話呢場戲相對簡單，只係互相傾偈，預告反而有另一場同諾懿更大尺度嘅演出，拍攝時極度緊張，拍拍吓要離場做安全措施。

因為劇集涉及離婚，出軌、不忠等議題，加上Yoyo破格演繹，令現實中Yoyo屢傳婚變新聞再度炒熱，Yoyo拍攝前後冇被事件影響：「反而好開心，好多人問我係咪本色演繹，投入感好高，證明角色好成功。」而子溢聽到好多共鳴聲音，仲話喺六位主角當中，有六種性格，正好配合唔同嘅愛情觀，即使唔中，喺劇中情節點都會中一樣。

#婚後事 #陳自瑤 #羅子溢 #黎諾懿 #床戲 #離婚 #出軌 #不忠