寇鴻萍的富商丈夫梁廷鏘日前偷食斷正，事件曝光後，夫婦二人昨日首度一起現身公開場合，笑晒口手挽手在沙田馬場上演恩愛大龍鳳。而身為梁廷鏘首任妻子的邵氏前女星于楓，昨日直指當年便是因為當場撞破梁廷鏘偷食才離婚，對於前夫再次偷食斷正，她見怪不怪地說：「佢都慣㗎啦！」

前港姐寇鴻萍（Isabella）的商人夫婿梁廷鏘（Patrick），被踢爆於上周在旗下酒吧FEVAR夜蒲攬女，更肉緊到摸臀兼錫頸。雖然偷食斷正，沒想到事隔才數天，夫婦二人已火速和好，昨日寇鴻萍和梁廷鏘名下的新馬「霹靂槍」首次出戰，他們齊齊現身沙田馬場打氣兼晒恩愛，同行還有梁廷鏘與首任太太、邵氏前女星于楓所生的兒子。

自嘲頂痰罐老婆

現場所見，寇鴻萍與梁廷鏘並肩而行，兩人看來神色自若，笑笑口心情甚好，寇鴻萍見到記者似乎表現錯愕，但其實她早已相約相熟的周刊記者入場後接受專訪，剖白婚姻危機。
行差踏錯的梁廷鏘被記者包圍時顯得十分尷尬，但表示已得到太太原諒，他面懵懵地說：「好番喇！」被問到如何番太太及有否頂痰罐認錯時，他說：「你睇我（頂到）頭都扁咗，冇乜嘢喇。」會否減少夜蒲？他說：「會！少啲飲酒，嗰晚真係飲咗酒。」他又重申不認識被攬的女郎，追問他當晚的情況時，他即說：「真係唔記得，飲大咗。」他過去經常送錶及送手袋給寇鴻萍做生日及結婚周年禮物，今次偷食可需要加碼送鑽石或送樓老婆？他搞笑地說：「你話送乜嘢好呢？送一粒鈕？」
儘管寇鴻萍表現從容，但被問到是否已饒恕老公時，她卻不作回應，只笑說：「我哋今日有匹新馬『霹靂槍』出呀！」會否離婚？她反問記者說：「你話呢？」兩公婆之後上了會員包廂，愛駒出賽前，他們又返回會員席，見到記者即刻意挽着手合拍地晒恩愛，但一落到沙圈草地，就各有各與朋友傾偈。
結果寇鴻萍夫婦的愛駒「霹靂槍」三甲不入，梁廷鏘表示不失望，他說：「冇，都要畀佢試吓㗎，隻馬喺澳洲買嘅，百幾萬啦。」賽事結束後，梁廷鏘駕駛積架名車接載寇鴻萍離開，返回堅尼地道富士屋寓所。

「嫁有錢仔都係牙煙」

事實上，梁廷鏘偷食早有前科，73年他與首任妻子于楓結婚，二人的婚姻便是因其第二任妻子周伊倫介入致離婚收場。記者昨日致電于楓，談到前夫偷食斷正一事時，她見怪不怪地笑說：「佢慣㗎啦！我同佢結婚之後都知佢花弗，嗰陣時老爺奶奶對我好好，好錫我，諗住佢會改，我就隻眼開隻眼閉，同佢講：『你做乜都好，千祈唔好俾我見到，當係尊重吓我。』點知最後都俾我無意中撞到。」
提到當年梁廷鏘偷食斷正，于楓仍歷歷在目，她說：「嗰日佢以為我送個仔返學唔喺屋企，於是帶埋個女人（周伊倫）返屋企換衫，點知上到嚟見到我喺屋企。當時我仲好大方咁請埋個女人入嚟坐，又斟埋茶佢飲，話晒過門都係客。我當時一啲都冇嬲，因為嫁呢個人嘅時候，心裏邊已經有晒準備，之後我哋簽紙分居，老爺奶奶勸我唔好，叫我畀個機會佢，我就話分居嗰兩年如果佢肯返屋企，我就唔離婚，點知佢兩年都冇返過嚟。」
于楓續說：「嫁得畀呢啲有錢仔都係牙煙，我冇睇過啲相，但噚日有人同我講佢單嘢（偷食），我都冇乜嘢感覺。」記者告訴于楓昨日梁廷鏘與寇鴻萍在馬場晒恩愛，她笑說：「佢哋兩個都係做戲。」婚姻失敗令于楓對一紙婚書失去信心，故與葉振棠拍拖十多年，從未打算結婚，她說：「結婚只係一個形式，最緊要兩個人相處開心就足夠。」
採訪：顏英儀、戴彩煥
攝影：陳慧安、娛樂突發組

人物誌：于楓離婚後戀葉振棠

梁廷鏘的第一任妻子于楓，曾為丈夫誕下一子，後因梁的第二任妻子周伊倫介入，致二人離婚收場。于楓是邵氏前女星，曾拍攝電影包括《金印仇》、《北地胭脂》及《蕭十一郎》等，她跟梁廷鏘離婚後，曾先後效力無綫和亞視，並跟資深歌手葉振棠走在一起，又擔任男友的事務經理，偶爾一起登台表演。07年，于楓曾參演亞視處境劇《大城小故事》。

娛樂資料庫：賤男自有癡情女

寇鴻萍老公梁廷鏘夜店偷食斷正，居然獲妻子特赦，其實過往也有不少賤男個案，尤以倪震和周慧敏這一對最令人百思不得其解。

倪震
與周慧敏相戀19年的倪震，去年底在蘭桂坊偷啜城大女生張茆，竟獲原諒，二人更戲劇化地於今年1月拉埋天窗。

周立璟
花弗男周立璟當年跟AnaR.拍拖期間，到處拈花惹草，AnaR.歷經「七擒七縱」後，終於06年死心，忍痛分手。

黃岳泰
著名攝影師黃岳泰06年背着太太羅秀慧，在灣仔街頭生擒醉酒女伴（圖），又到時鐘酒店狂歡，事後向老婆負荊請罪，獲妻寬恕。

吳鎮宇
吳鎮宇06年被拍得與陳雅倫親吻的短片，後指和太太一起看過該片段，其間他在旁解畫，聲稱太太並沒生氣。

梁榮忠
梁榮忠05年背着女友鍾麗淇與朱慧敏車震，受盡千夫所指的他起初竟獲女友原諒，但翌年鍾麗淇搬出愛巢，正式跟賤男一刀兩斷。

資料來源：《蘋果》資料室