網購信用卡主打高回贈？小心呢啲中伏位

原來已經有一段時間無寫過信用卡，今次忍唔住要講吓，純綷因為想講吓東亞銀行同恒生銀行。呢兩間銀行各自都有張以「網購」為主打嘅卡，華田就一直都覺得非常難用，亦一路都想寫篇文講吓呢兩張卡，只係一直都搵唔到一個切入點。你知啦，無比較就突顯唔到啲優／缺點嘛。咁滙豐呢張Red Card嘅出現就正正啱晒我需要，有真霸者先睇到邊個係偽王嘛。

【延伸閱讀】【網購信用卡】滙豐新推Red信用卡　不設現金回贈上限（附網購信用卡回贈比較）

成張Red Card我諗亮點只有一個，亦都大大隻字寫咗喺條promotion banner嗰度，就係「網上簽賬4%回贈」。大家可能會話雖然4%回贈都幾多，但係論網上簽賬，東亞銀行張i-Titanium做緊3.4%、恒生銀行張mPower甚至做緊4.4%啦，有咩咁特別呢？

最特別個位係呢兩張嘢其實係「叫就大大聲、做就驚驚青」，滙豐呢次係真王降臨，突顯晒呢兩間銀行嗰兩張卡嘅着數有幾難攞有幾難用，畀幾張圖大家睇吓：

東亞銀行的回贈上限

簡單啲講，東亞銀行個extra 3%回贈最高一個月只有200港元，即係你一簽6,667港元就爆cap然後就沒有然後了，如果你只係買吓HKTV Mall都仲好啲，你買兩張來回歐洲機票就爆硬。

咁又剩係攞嚟買HKTV Mall又得唔得呢？得，不過提提你記住一個月要簽夠1,800港元先會有extra 3%回贈。以我為例，我就係HKTV Mall Fans嚟嘅，乜鬼都HKTV Mall搞掂，但係都買唔到1,800蚊一個月噃，即係仲要淘吓寶（人仔結算 + 1.5%手續費……已經平過其他銀行）或者閒時用嚟食吓飯先得。

【延伸閱讀】【雙11】提防網購陷阱 精明消費6大貼士

恒生銀行的使用侷限

到恒生嘞。網購4.4%完勝4%啦！？錯錯錯，睇清楚睇清楚。網購4.4%只限喺淘寶（即係外幣消費，盛惠1.95%手續費）、iTunes同Google Play（你可以使用幾多錢？），其他網購就sorry一律2.4%。

呢度留4個注腳：

1. 淘寶其實係可以唔使畀外幣Exchange fee嘅，就算你無內地戶口，都可以叫男女朋友P2P轉賬港紙入你個Alipay HK再用嚟畀淘寶，賺信用卡積分之餘亦都無Credit card exchange要畀。

2. 佢同東亞銀行一樣都有回贈上限，逐個Category去計算，個計算方法仲相當複雜，我睇完T&C都唔太明，大概就係頭cat1 + cat2加埋每月上限100元、cat3 200元、cat4 100元。我都唔太肯定我啱唔啱，大家最好自己睇Point 11–13。

3. 佢個「本地餐飲4.4%」就更加唔掂，因為佢只限於Mobile payment，即係話個Use case只可能係輕食快餐，你諗吓你請女朋友去半島High tea或者請屋企人去Inter-con食自助餐嗰陣，會唔會同個侍應講「我同你行出去畀Apple Pay OK？」？

4. 我明白張M仔主打年青人嘛，所以半島食飯唔係Use case，但係你又每個月要有3,000蚊Retail purchase先可以有4.4%回贈喎。喂，東亞銀行張卡都只不過要每月消費1,800蚊，M仔會唔會要求又高咗啲呀？

滙豐Red Card的霸氣

滙豐呢張Red Card又如何呢？簡單之極，用返佢啲tagline：

4%網上簽賬，無回贈上限、無最低簽賬要求、毋須登記賺獎賞及永久免年費。

申請要求只係月薪10,000元，而呢張仲要係World MasterCard添……你叫東亞同恒生情何以堪呢。

【文章來源：華田銀行；已獲授權轉載。原題：信用卡閑談（20） — 匯豐 Red Card 如何盡顯霸氣】

【關於作者】
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。