國足換帥　70歲艾雲高域領軍

中國國家足球隊官方宣布，委任將滿70歲克羅地亞教頭艾雲高域為國足主帥，帶領球隊爭奪2026年世盃出線資格。

亞洲盃分組賽出局後，亞歷山大‧揚科維奇被辭退，中國足協邀請艾雲高域上任。艾雲高域同樣係今屆亞洲盃決賽周教頭之一，率領阿曼征戰，同樣分組賽出局，3戰攻入2球，表現比國足好，而且亞洲盃前熱身賽仲贏過國足，阿曼出局後亦告離任，立即轉到國足執教。

中國足協今次選帥有4點考慮，首先係要熟悉亞洲足壇，其次係要熟悉中國足壇，第3係必須為歐洲頂級教練，第4係曾執教中超球隊。艾雲高域係1998年世盃季軍克羅地亞助教，曾執教伊朗及阿曼國家隊，2009年執教山東魯能泰山，1年後領軍奪得中超冠軍，兼成為中超最佳教練，艾雲高域符合晒上述要求，呢分工可以話係為國足度身訂造。

呢位國足新帥年薪為150萬歐元(約1,270萬港元)，首場領軍賽事係3月21日世盃外作客新加坡，只得1個月時間，睇吓艾雲高域係咪教到國足識飛。