王祖藍與李亞男2015年拉埋天窗，去年誕下愛女王天韻（Gabrielle）。兩公婆為剛踏入1歲的Gabrielle慶祝，喺生日會上左右夾攻向女兒獻吻！仲準備咗個兩層高嘅生日蛋糕，上面除咗有個好大「1」字外，更有女兒個英文名，不過首個生日嘅蛋糕竟然串錯字，連王祖藍都表示：「一歲生日快樂！不過你個名真係太難串，搞到蛋糕姐姐都失手串錯咗，其實我都唔係好識串，大家唔介意可以稱呼佢GABBY，下次要改個簡單啲嘅英文名。」

而李亞男對女兒亦作出深情對話，以英文表示：「一歲生日快樂！生日快樂親愛的公主！媽媽和爸爸永遠愛你並珍惜你，直到你有其他愛你的人為止。」而壽星女眼仔睩睩又紮起孖辮相當可愛，而網民就紛紛討論Gabrielle靚樣，事關佢再細個啲時就同亞男兒時餅印一樣，而依家嘅佢個鼻就似乎似祖藍，究竟似媽媽定爸爸多啲呢？

而昔日「處女黨」成員王君馨同苟芸慧亦有出席生日會，同李亞男拎住馬卡龍Seflie，三女仲好有少女味！