m18講場：優必選兩大機械人識敲鑼　仲有勁多功能估你唔到？

周五(29日)係港股2023年最後一個交易日，內地機器人公司優必選(09880)成為本年最後一隻掛牌新股，公司仲搵咗生招牌「優悠」及「Walker S」一齊參與上市儀式，而「Walker S」仲有份敲鑼添，當然成為眾人嘅「打卡」焦點啦！

「優悠」係一個熊貓外形嘅機械人，主要用喺商業場景。唔講唔知，係公司為杜拜世博會中國館專屬訂製㗎，以作為中國館嘅「和平友好使者」。佢喺上市儀式現場好識做，一時做歡迎手勢，一時又畀心，兼擺哂甫士等大家同佢合照，氹得一眾嘉賓笑到見牙唔見眼。聽聞佢仲識跳舞、打太極，不過小記今日就未有機會見識到。

除咗身負「打卡」任務，仲要負責「交棒」。無鑼棒又點敲鑼呢？呢個任務夠哂份量。

至於「Walker S」就係公司今年新產品，一款應用於工業產業嘅機械人，仲同幾家新能源車企合作，分階段規劃機械人喺製造業中應用。