史達寧食物中毒痊愈　瘦身復操

車路士翼鋒史達寧月初英超對曼聯之後，缺陣近2場比賽，當時領隊普捷天奴透露呢位29歲英格蘭國腳抱病在身。根據英國《每日郵報》最新爆料，史達寧係因為食物中毒，導致身體脫水，幸好現時已經痊愈復操，希望爭取復出踢周日(21日)凌晨英足盃4強對曼城。

史達寧對曼聯一役，曾經後備上陣，並冇受傷，但近2場對錫菲聯、愛華頓都冇份披甲，原來係食物中毒。據悉史達寧出現嘔吐、脫水等症狀，佢同病毒搏鬥期間，體重亦下降，網民抽水認為史達寧可以趁今次生病「瘦身」，可能反而有利將來上陣發揮。

史達寧今季為車路士各項賽事上陣38場入8球，包括英超兩循環對曼城，都取得入球，可見佢倒戈「藍月亮」，表現特別醒神。車路士今次英足盃對曼城，史達寧能否上陣，對於戰局可能會產生關鍵性影響。