領展改建天水圍街市 仲有幾多老舖頂得住？

領展趕走小商戶都唔係咩新聞，近日又再有動作，位於天水圍天澤街市，被領展轄下嘅承租商，提早中止商戶合約，重新裝修，將原本下層街市改成零售商店，令街市檔口由144檔減至58檔。唔少商戶已經貼出「街市裝修，結業清貨」等大字報。天澤街市係附近4條屋村包括天恒、天澤、天逸、俊宏軒，超過6萬人嘅主要街市。今次改建，除咗趕走小商販之外，預計留低嘅都會大幅加租。好多天水圍居民都叫苦連天，要捱貴菜，甚至要跨區去買餸。對於夜食住行最緊要嘅小市民，街市無疑係最切身處地影響生活嘅，人又多，店又少，價錢貴，但偏偏別無選擇，只能硬食。就算唔講今次受影響嘅天澤街市，其實好多原本嘅街坊小店都已經一早被人趕走，包括以下：

荼餐廳
屋村荼餐廳大排檔一向係居住用膳之選，奈何領展壟斷全港屋村商場後，只有大集團下嘅飲食集團先可以負擔租，君不見個個領展商場都有同樣嘅連鎖餐廳咩？反而老子號嘅街坊茶餐廳已經買少見少。

文具舖
細細個最愛去文具舖，除咗買文具之外，仲因為當中有唔少玩具、精品可以買，不過領展進駐後，傳統舊式文具舖根本無法負擔租金，加上本身文具舖嘅貨品亦開始脫節，宜家要搵到一間文具舖？難咯！

糧油舖
大型超市壟斷之下，以前阿媽買米買油一定要去糧油舖，宜家已經全部消失咁濟。開門七件事，有咩超市買唔到先？莫講話糧油，連肉檔、魚檔、菜檔相信都好快會被消失。