（本報訊）今日係情人節，估唔到同大台「有合約，冇合作」的許亦妮咁快就有戀事宣佈！

日前讀者鍾先生透過《蘋果》「爆相爆料」，話在元宵節（上周六）下午12點半左右，見到許亦妮同一位年輕男士去沙田車公廟拜神。當日許亦妮全身黑衫黑褲，戴住頂三色cap帽；而個男仔亦係全身黑色，行起路上來霸氣十足，似足吳岱融在劇入面的角色一樣咁有型有格。鍾先生話先在廁所門口見到許亦妮，唔少人對佢眼望望，原來係等緊「嫩版吳岱融」去完廁所出來，鍾先生話﹕「都有唔少途人認到許亦妮，見到佢會望。個男仔去完廁所出來，他們就即刻好煙韌咁攬埋一齊，女的仲捉住男仔隻手，都幾sweet。可能我見到他們時已經拜完神，好快就走了。」
元宵節當晚許亦妮現身灣仔的福音活動晚宴時，仲話自己有人追，但未有拖拍；不過今次擺明「斷正」被影到拖手仔，許亦妮不認不認還需認。許亦妮昨日透過短訊回覆傳媒話﹕「我們剛剛開始發展中，希望大家比點空間我們啦！」現年28歲的許亦妮入行5年首度公開戀情，問到是否真命天子？佢話﹕「每次拍拖都會視對方為結婚對象。但係我們剛剛開始，給點時間我們雙方了解同認識對方先啦……我們雙方都以呢樣目標！」但問到男友叫乜名做什麼？許亦妮立即封口唔願講，佢話﹕「唔好啦，佢係圈外人，唔想影響到個男仔。」不過許亦妮就對男友讚口不絕話﹕「呢個男仔幾好，心地善良。佢已經見過晒我所有好朋友，初步過關，我先真係考慮同佢開始發展。我們都一樣，最近感受到主的恩典，想成為基督教徒，佢會願意同我一齊去教堂，一齊祈禱。今次同個男仔去廟，其實係個男仔最後一次去廟還神。」

看許亦妮最近的instagram，又確實係如沐春風，昨日擺了張騷手弄姿的相，留言﹕「呢個人成日整蠱我，影相時成日叫我做奇怪pose....但係影相技巧的確有進步。」相信拿相機影相的「呢個人」就係被許亦妮視為結婚對象的男友喇。