【明報專訊】嚟緊星期日就係母親節，有無媽媽擔心仔女唔訂枱食飯慶祝呢？大律師曾藹琪（Olivia）近日係YouTube拍片分享（圖），話全職母親為屋企人付出同犧牲好多，容易承受壓力，埋怨仔女唔夠感恩。佢建議各位媽媽轉念一想，當年嘅結婚誓辭都無話要養大仔女，與其埋怨仔女唔夠感恩，倒不如改變玩法，主動請仔女食飯，由被動角色改為主動。
Emily發現，曾大狀都算係新丁YouTuber，名為「大狀Drama Queen」嘅頻道開咗兩個月左右，題目主要係說話技巧同人際關係。過往曾大狀經手唔少刑事大案，包括2019年7月28日上環「赴湯杜火」暴動案，代表被控暴動罪嘅少女李宛叡，李最後被裁定罪名不成立。
Emily聽聞曾大狀已經同家人移民英國，近年都有唔少法律從業員因各種原因離港。睇番2022年大律師公會主席報告，喺2021年1月至2022年12月，大律師會員由1578人增加到1612人，不過有一啲會員決定退休同移民（relocation）。