派散水餅 老細抽水鬧冇義氣 工程師whatsapp大反擊

打工嘅嘢，好來好去嘅啫。一盒散水餅，一句前程似錦All The Best，係咪門面工夫？是但啦，最緊要唔好搞到核核突突。   網上有個whatsapp訊息截圖流出，一位喺蓮塘口岸工作嘅工程界打工仔last day，喺群組send message通知同事已經準備「散水餅」，多謝大家一直以來嘅照顧。

點知轉頭一位疑似老細嘅人物就留一句「乜喺地盤危急時散水，係人所為？」。   都last day啦，仲想攞個尾彩？   Last day打工仔等到6點收工之後即刻留言反擊，首先用「舊老細」教導嘅「地盤一日未完，每日都係危急時間」，回敬「地盤危急時散水」呢個point。

反駁完就梗係講吓自己有幾仆心仆命，但係老細都唔滿意，輕輕拎返少少分數。   之後就出拳啦！Last day打工仔話近呢兩個月唔少人辭職，要工程師冇工程師，要雜工冇雜工，舊老細可謂「功不可沒」。而且舊老細不斷調人走但又係咁話人唔做嘢，工作量去到極限！   Last day打工仔又話，喺呢個地盤做咗5年幾，最後一日都要俾人咁樣話，覺得好心寒。然後「潤」舊老細人格同涵養都有問題，叫對方睇多啲書，串到盡！

唔少網友都撐Last day打工仔，認為舊老細唔識做人，有咩唔使公開講，而家反而被人過一楝！亦有人認為「山水有相逢」，對方話晒都係管理層，打工仔他日轉工唔轉行的話，隨時俾人講壞話。   有行內人爆料話嗰位好小器老細曾經係被公司派去「重點培訓」嘅管理人員，爆單咁嘢之後，會唔會都好傷呢？ 來源︰網上圖片