劉浩龍唔怕祖兒呷醋　狂讚心悠靚女

劉浩龍（師兄）與劉心悠錄影無綫節目《Big Boys Club》，為主演電影《燈塔下的戀人》宣傳，提到兩人於戲中大跳印度舞，師兄自爆遭對方取笑：「拍攝時，佢唔使拍就坐埋一邊，一路望一路笑，好尷尬。每次做任何騷，我一排親舞，身邊嘅藝人、同事都用咁嘅笑容望我，我每一次都好認真去跳，但可能認真過頭變咗好搞笑，我跳舞好似打功夫咁。」心悠即解釋：「我笑係覺得佢好得意，好有喜劇天份，因為佢好認真。」問到是否穿着性感舞衣，師兄笑指心悠打扮好封閉，心悠即反駁笑謂：「咩封閉！有見到啲肉，上身係短嘅，有露中間嗰度（腰）。」

「祖兒咩都撐」

師兄又直言六、七年來首拍愛情片，大讚遇上好對手心悠，令他好舒服地容易投入，又讚對方靚女：「佢着印度裝好靚，因為佢五官眼大鼻高，都幾似印度人。」如此讚口不絕，會否怕女友容祖兒（Joey）呷醋，他笑道：「靚就梗係要讚㗎啦，係一個好嘅對手，唔會。（跳畀Joey睇？）梗係冇啦，想睇咁精彩嘅嘢梗係入場睇啦。（女友去睇？）佢乜都支持，有機會都會一齊睇，之前啲戲都一齊睇。」有指「未來外母」對他不滿，問到會否請容媽睇戲破冰，師兄笑謂：「邊個去都冇所謂啦，支持呢套戲，你阿媽、我阿媽、大家嘅阿媽都一齊去啦。」心悠亦幫口笑稱媽咪也會去。

新片用神交形式拍拖

至於與心悠有否親熱鏡頭，師兄笑指首拍愛情片，導演怕他難以投入，故最親熱只有為心悠抹嘴：「我知個個都有，Babyjohn有強吻、Stephy又有，我就冇，一步步嚟，如果大家今次覺得我哋合襯，下一部就慢慢嚟，今次連拖手都冇，我哋係好神交形式，係好Pure嘅愛情，我哋係以咖哩會友。（可惜？）唔會，因為個畫面仲touching。」心悠則笑稱與師兄工作可笑到練肚。