超合金魂Tryder G7無敵七重變形體
所謂「七重變形體」，並唔係令香港人睇到好唔自在嘅《TF4》，而係超合金魂嘅最新作品GX-66《無敵Robot Tryder G7》，相關動畫喺1980年於日本首播，同期推出嘅玩具大Sell「完全七型合體」噱頭，Tryder G7嘅頭部小型偵察機已經有三種變法。30多年後嘅今日，GX-66亦忠實繼承七重變形體呢個Gimmick，而且配件多多，造型仲英過當年嘅舊版玩具多多聲，身為「超級系」機械人嘅狂熱支持者，唔買點安樂？
超合金魂 GX-66《無敵Robot Tryder G7》
建議零售價：$2,499.9
打開Tryder Shuttle嘅背部閘門，再拉出輸送帶，就可收埋變身用嘅坦克底盤。
雖然《無敵Robot Tryder G7》未有喺香港播過，不過唔緊要，隨盒有圖文並茂嘅說明書，幫各位玩具迷補習一番。
筆者最鍾意奇怪武器，呢件「血滴子」就最啱心水。
兩把Tryder．Saber嘅柄位可以從膝蓋拔出，劍身仲有電鍍效果。
腰側設有掛榫，可以裝嵌Tryder．Cutter，又可改用插榫連接手掌，擺出攻擊姿勢。
除咗Tryder．Beam Cannon，仲可以換成模擬伸縮功能嘅Tryder．Ruler，後者喺故事中作為攀爬之用。
七變逐樣數
Tryder．Cosmic
Tryder偵察形態
Tryder陸上形態
Tryder水用形態
Tryder．Fortress
Tryder．Beagle
Tryder．Eagle
話說劇中主角係小學六年級生竹尾和太，既是學生，亦係「竹尾綜合會社」嘅社長，需要駕駛Tryder G7四處解決難題幫公司賺取經費，主要任務就係對付邪惡嘅外星Robot帝國，有時仲要全公司總動員一齊出動，包括管家、秘書等駕駛支援戰艦Tryder Shuttle協助，成班人飛天遁地之餘又要衝上太空，故此Tryder G7要變足七款形態先Handle到咁龐大嘅工作量。除咗機設有創意之餘，劇情風格亦傾向輕鬆、幽默，唔似傳統嘅機械人動畫咁氣氛沉重，成為當年嘅話題作品，可惜一直未有喺香港嘅電視台播放，有興趣嘅爸打惟有上網睇短片了。
超簡單變形方式
言歸正傳，唔計Tryder G7本體跟Tryder Shuttle前後合體嘅要塞形態，Tryder G7本身已經有兩種飛行模式，超合金魂當然忠實還原，好似最基本嘅「Cosmic」形態，先將機械人嘅胸部向兩側拉出，再將雙手疊起及向後扳，而髖關節就往後縮，並且拍齊雙腳，最後將腳掌向外伸直，再露出機翼變成機首就成事；至於「Eagle」嘅變身方法就以Cosmic為基礎，將雙腳向後扳，再插上小型偵察機做機頭。陸上戰方面，Tryder G7可以變成戰車模式，變法比Cosmic及Eagle仲簡單，以機械人形態為本，先將雙腳呈90度向前屈起，底部再加裝坦克底盤，快過淥杯麵。
武器多多添玩味
至於其餘三種變化，統統落於小型偵察機、亦即係機械人嘅頭部Tryder之上，只要揭起臉部，將藍色透明罩向前拉出，再伸長機首就會變成偵察形態；如果縮回機首再摺疊機翼，之後喺底部拉出車輪，就變成陸上形態；最後一款就係將前端嘅黃色角位往後扳，再從機翼及底部翻出滑翔板，就變成水用形態。玩足七種變身之餘，超合金魂Tryder G7仲有大量武器跟身，例如《機戰》電玩系列常見嘅長矛及手槍，仲有一把有彈射功能嘅手槍、一對長劍及「血滴子」等，當然唔少得專用台座，畀大家企企理理放齊晒啲武器，咁就唔怕遺失組件啦！
查詢：2433 1828（瑞華行）
