Kukabiliana na sintofahamu ili kuhakikisha safari za UNHAS zinaendelea Haiti
Helikopta ya UNHAS inatua Ile de la Tortue karibu na pwani ya kaskazini mwa Haiti.
Kukabiliana na sintofahamu ili kuhakikisha safari za UNHAS zinaendelea Haiti
Amani na Usalama
Wanawake wawili wanaohusika katika shughuli za kila siku za shirika la Umoja wa Mataifa la huduma za anga za kibinadamu, linayojulikana kama UNHAS nchini Haiti, wanasema wanapaswa kukabili hatari na msongo wa mawazo ili kufanya ndege hizo ziendelee kuruka.
Mji mkuu wa Haiti, Port-au-Prince, unakabiliwa na ukosefu wa usalama kutokana na ghasia za magenge ya uhalifu na sasa UNHAS, ambayo inasimamiwa na Shirika la Umoja wa Mataifa la Mpango wa Chakula Duniani WFP ndilo chaguo pekee kwa wafanyakazi wa misaada ya kibinadamu kusafiri salama ndani na nje ya mji na kwa ajili ya vifaa muhimu na misaada kusafirishwa na kusambazwa ndani ya nchi.
Robine JNBaptise, anayefanya kazi katika shirika la UNHAS, na Christine Blais, ambaye ameajiriwa na helikopta za ujenzi, kampuni ya anga inayoendesha ndege hiyo, wamezungumza na UN News kuhusu uzoefu wao wa kufanya kazi katika eneo lenye migogoro mingi.
Robine JNBaptise: Tuna ndege mbili hapa Haiti, helikopta ambayo inachukua watu 19 au inaweza kubeba tani mbili au mizigo na ndege ya mrengo 45 ambayo hubeba watu tisa. Mimi ni msaidizi wa usafiri wa anga na uhifadhi, kwa hivyo nina jukumu la kuwafanya watu wapande na kuwashusha Kwenye ndege. Pia ninasaidia kwa masuala ya utawala na kupata vibali vya uendeshaji.
Christine Blais: Nimehudumu kama fundi wa ndege na mkuu wa operesheni ya safari za ndege kote Haiti. Siku yoyote ile, tungeruka kati ya saa mbili hadi sita. Ndege zetu sasa ziko Cap Haitien, lakini tunasafiri kutoka Turks na Caicos na pia Jamhuri ya Dominika.
Robine JNBaptise: Ni kazi yenye shinikkizo, lakini kwa bahati kwangu, ninafanya vizuri sana chini ya shinikizo. Katika baadhi ya siku, tunasaidia hadi watu 100, hasa mashirika yasiyo ya kiserikali au wafanyakazi wa NGO, lakini pia wafanyakazi wa Umoja wa Mataifa. Tunahamisha watu hadi sehemu salama zaidi za nchi, lakini pia tunarudisha wafanyikazi muhimu Port-au-Prince. Tumehamisha takriban watu 200 hadi maeneo ya nje ya Haiti, kwa hivyo mwisho wa siku, ni kazi ya kuridhisha.
Christine Blais: Tunapotua Port-au-Prince, tunajaribu kupunguza muda wa kuwepo chini i ili kupunguza hatari. Tunaweza kutua, kupakia na kuondoka ndani ya dakika mbili hadi tano, ambayo ni haraka sana. Tuna wafanyakazi wazuri sana wa ardhini ambao wanatuweka salama. Katika eneo lenye migogoro mingi, tunapaswa kuwa tayari wakati wote huku tukikabiliana na mahitaji ya Umoja wa Mataifa.
Helikopta inapaa angani juu ya eneo la mijini huko Haiti.
Robine JNBaptise: Moja ya changamoto kubwa tunazokabiliana nazo ni kuruka juu ya Port-au-Prince, ambapo magenge yanapigana wao kwa wao au na polisi. Daima kuna hatari kwamba moja ya ndege zetu itapigwa na risasi iliyopotea, ingawa sidhani kama ndege yetu inalengwa kwa makusudi.
Christine Blais: Wenzangu walikuwa kwenye uwanja wa ndege wa kimataifa wakati kulikuwa na uvunjifu wa usalama. Hakika ulikuwa ni wakati wa hatari na wa kutisha kwao kwani risasi zilikuwa zikifyatuliwa walipokuwa wakifanyia kazi ndani ya ndege. Ndege ya biashara, iliyokuwa ardhini wakati huo, iligongwa.
Robine JNBaptise: Uwanja wa ndege wa kimataifa ulifungwa kwa wiki kadhaa, kwa hivyo tukaanzisha eneo la kutua mahali pengine. Wasiwasi mmoja mkubwa ni kwamba magenge yanaweza kuhamia eneo hili na kuchukua eneo la kutua hali ambayo ingesimamisha shughuli zetu.
Hii inaweza kuwa kazi ya kutisha, lakini sasa tumezoea hatari na mabadiliko, ingawa tunahakikisha kuwa hatuchukui hatari. Lazima nikumbuke kwamba chochote kinaweza kutokea kwangu au ndege.
Christine Blais: Katika maeneo yenye migogoro mikubwa, daima kuna mambo yasiyojulikana, na tunapaswa kufahamu vitisho kila wakati. Ninategemea sana timu yetu na ninaelewa kuwa ikiwa kitu kitatokea, lazima tukishughulikie kinapokuja
Abiria akiwasili kutoka kwa helikopta ya UNHAS.
Robine JNBaptise: Huduma tunayotoa kwa kweli inaokoa maisha, kwa hivyo ikiwa maeneo yetu ya kutua yatafungwa, itakuwa mbaya. Huku UNHAS, tunahitaji kuwakumbusha watu kila mara kwamba sisi ni huduma ya kibinadamu na kwamba hatuegemei upande wowote. Jukumu letu ni kusafirisha wahudumu wa kibinadamu na misaada ya kibinadamu ili kusaidia watu walio katika shida.
Sijawahi kufikiria kuondoka nchini. Nikiondoka, basi ni nani wa kukaa? Kama Mhaiti na mfanyakazi wa kibinadamu, ninataka kuwa hapa na kusaidia kurudisha nchi mahali ilipokuwa.
Wakati fulani, hali itaboreka kwa sababu tunapofika chini ya mwamba, hakuna mahali pengine pa kwenda isipokuwa juu. Hapa ni nyumbani kwangu, na ninataka kuwa sehemu ya mustakabali mzuri wa Haiti.