【明報專訊】又有免費機票可以搶啊！香港航空公布，第二階段送機票活動將會喺8月7號上午10點開搶，合共會送出9800張香港出發0元來回機票，包埋20kg寄艙行李。
活動網站將會喺當日開放，亦會提供目的地、規則及參加辦法嘅資訊。
目的地包括曼谷名古屋杭州等
港航話，第二輪送機票活動涉及7個目的地，包括曼谷、三亞、北京大興、杭州、名古屋、南京、首爾。旅遊日期為今年9月1日至下年3月24日。但要留意嘅係，部分日子係無機票提供，同埋逗留期限須介乎2至7日之間。仲有，機票唔包括相關稅項、附加費及其他收費，旅客須自己承擔一切相關費用。
記得早啲起身做好準備，因為有關機票以先到先得形式送出。活動當日會喺 facebook 專頁更新各目的地機票嘅派發概况。
同一時間，外媒彭博話睇到香港航空嘅備忘錄，擔任香港航空董事會主席4年嘅侯偉，上星期（27日）被香港貨運航空董事長張有強接替。香港航空嘅代表就回應彭博，指公司高層近期的確發生變動，但保證會繼續致力向客戶、員工等提供最好嘅價值。
email: piano@mingpao.com
