【明報專訊】下個月10日就係農曆新年，通常喺𠵱家呢個時候，唔少人開始周圍搵定新銀紙或者外觀完好嘅「迎新鈔」嚟封利市，貪送舊迎新好意頭。其中一間發鈔銀行匯豐噚日就宣布，呢個月25日至31日會推出全港首個自動櫃員機「迎新鈔」提款服務，客戶可以喺旺角、觀塘同埋屯門市廣場分行嘅理財易中心，提取20及50元「迎新鈔」，而3架流動銀行車就會去到18個公共屋邨，畀用戶提取20元「迎新鈔」。
另外，1月25日至2月9日，匯豐用戶都可喺分行兌換新鈔同「迎新鈔」。用戶1月18日起可經流動理財或匯豐香港網站，預約到分行兌換新鈔或「迎新鈔」套裝；後者包括100張20元新鈔及20張50元新鈔，或新鈔同「迎新鈔」各3000元。用戶亦可即日朝早去分行取籌，喺同日指定時間兌換。
金管局噚日話，3間發鈔銀行會確保換鈔服務期間嘅新鈔同「迎新鈔」供應，提醒市民唔使喺服務開頭幾天趕去換。3間銀行會喺1月25至27日，提早營業時間至朝早8點，並且喺提早營業嘅第一個鐘頭提供換鈔服務，有需要時會向排隊輪候嘅客戶派籌同做分流安排。3間發鈔銀行喺1月18日起更會提供網上預約兌換新鈔及「迎新鈔」服務。