【明報專訊】城中社交界名人周啟邦（已故）夫人譚月清，本身是具有數十年地產投資經驗的長青樹，多年來在地產市場獲利不菲。她表示，雖然近期股市在低位，但暫時不會把資金投向股巿，並指恒生指數由2007年10月期間升至最高紀錄的3萬多點，至近期低過2萬點，股巿起落變化又大又快，令她現時仍持有「蟹貨」，「我以前喺3萬點水平買入啲股票持有到現在，所以我覺得投資物業穩陣啲。」
不過，自從去年政府實施限制住宅物業短炒的額外印花稅辣招後，譚月清亦暫時退出豪宅投資巿場，並將仍持有的豪宅物業期望盡量出貨，並要重新鋪定未來投資路向，專注具升值潛力的寫字樓或零售物業。她預期本港人口將不斷增加，但土地供應不足，地產物業價格長遠只會升，不會跌。
土地供應不足 樓價長遠必升
「依家經濟時勢唔好呀，樓價又太高，如果現在買樓唔係咁抵咯。不過，香港本來係地少人多，加埋近年大陸咁多人嚟定居或者做生意，土地又伸展得唔夠，所以地價將來好難話唔貴。依家房屋唔夠供應，港元又貶值，有、無海景嘅樓（指豪宅）都要2萬元一呎或以上，我相信樓價仲繼續有得慢慢上升。」
周太近年入巿目標專注一手豪宅樓盤，曾入市屋苑包括尖沙嘴名鑄、何文田半山壹號、數碼港貝沙灣等。不過，今年8月初期間，她一度準備購入嘉里（0683）上環新盤「西浦」3個單位，其後未知何故放棄，有消息指此乃她近期開始在住宅物業投資巿場打退堂鼓的第一次。
附近多鹹魚欄 棄購西浦
「本來都幾好嘅，但我去睇過之後，嫌佢附近好多鹹魚欄唔係咁好咯，呢一年來樓價都升咗好多，而且我都買得太多喇，最近樓價跌番一啲，因為政府近來推咗咁多政策出嚟，令到我近來買樓心情都降低好多。」
周太認為，現階段一手樓價偏高，如果投資者去年11月下旬後入市，更加受限於額外印花稅，不敢短期轉售（政府11月19日公布該措施），所以她持有的豪宅物業，現時趁還有溢價，盡量出貨，否則唯有暫時出租，收取只有2厘至3厘的回報。「我暫時冇計劃再入巿，我唔可以長期畀咁多貨『責』住自己。」
巿場憧憬未來兩年處於低息期，近日歐、美等國家債務問題，導致環球經濟前景未明朗，本港樓巿及股巿亦受波動，未見完全平穩過渡。周太認為，樓巿唔會忽然「嘭」聲下跌，港元隨着美元貶值令物價上漲，存款利息又低至不足一厘，過去兩年蔬菜和豬肉都分別貴兩倍及三倍。因此，住宅樓價未來一至兩年下跌機會不大。「但係我又唔敢話佢會『嘭嘭聲』咁升，因為畀政府咁多措施壓住，只係無先嗰兩年升得咁犀利。」
轉攻寫字樓 免受額印限制
早前周太已開始轉戰寫字樓投資巿場，例如買入黃竹坑One Island South部分商廈樓面再沽出也賺得不俗，故決定將投資物業計劃，由住宅巿場轉移去寫字樓巿場。
「因為寫字樓、零售物業唔受額外印花稅限制，我相信投資寫字樓都唔錯，價錢仲有得升，現時主要靠中環，金鐘核心區啲寫字樓供應係唔夠，將來又會有俄羅斯等外國企業來香港投資，到時會增加寫字樓巿場需求，有啲好嘅工廈轉做寫字樓都唔錯。如果地點好，價錢又唔貴嘅寫字樓或者靚舖，我仲會投資架。我沽貨溢價要有差不多兩成或以上至得架。」
周太指出，其實她在上半年內，已斥資逾1億元，買入荃灣其中一個1.3萬方呎可做酒樓的商業樓面，待有合適買家善價而沽。
那麼，多年來奔波於地產投資巿場，周太有沒有「槍手」或「跑腿」代其料理相關事項，令其投資計劃盡快完成？周太說：「完全冇朋友幫手架，亦都冇智囊團，因為佢哋嘅意見唔一定同我一樣，我完全靠自己個Feel，覺得點樣就點樣去做，所以睇樓都係我親自去睇，不過有陣時都有啲建築師﹑工程師幫吓我。所以好彩咪有賺咯，否則就普普通通咁咯。」
撰文﹕鄧雅各
攝影﹕葉漢華
App下載
