修咸頓入決賽　同列斯聯爭奪1億鎊英超席位

周六(18日)凌晨英冠升班附加賽4強次回合，修咸頓主場以3比1擊敗西布朗，兩回合合計以同樣比數勝出，晉身決賽，將於5月26日晚喺中立場倫敦溫布萊球場同列斯聯交鋒，爭奪一個英超席位。

雙方首回合打和0比0，修咸頓今仗返回主場比賽佔上風，戰至49分鐘由中場史摩邦尼入波打開紀錄，加上前鋒阿當岩士唐梅開二度，領先3球之後大局已定，即使補時被西布朗追番1球，都無阻「聖人」打入決賽。

值得一提，兩支決賽球隊修咸頓、列斯聯都係上季由英超降班，換言之，勝方將可以闊別一季就立即重返英超。英超球隊每季最少可以獲得1億鎊(約9.9億港元)轉播費及獎金等分紅，可以大幅增加球會收入。