《龍鳳鬥》中的輸贏 — 睇完《龍鳳鬥》,心有感動。 — 好多人可能會唔鍾意電影個結局,劉德華喺臨死之前搞咗壇大龍鳳,包括買通闊太,搵人幫佢偷珠寶,希望鄭秀文覺得自己仲在生,仲會同佢玩果個偷呃拐騙嘅遊戲。 — 但觀眾就會問:然後呢?當盜太再想同盜生見面嘅時候,佢一定會再結婚,到時佢一定會知道劉德華嘅消失。 — 波子棋,鋤大dee,賭狗賽馬,每次比拼總係劉德華贏,或者喺佢嘅全盤掌握之內。盜生將自己嘅所有家產都轉移曬比盜太,果一刻鄭秀文先知道劉德華原來有錢過自己好多。愛情入面係咪一定要分輸贏架呢?去到最後,盜太成為咗香港嘅女首富,盜生將咁多年嚟贏嘅嘢都比曬自己,愛情原來無分贓唔勻呢回事,只有一齊贏同一齊輸。 — 鄭秀文始終都會知道劉德華已經不在人世,但最少佢可以開心多三個月,或者半年。因為愛一個人,所以同果個人離婚;因為愛一個人,所以選擇嫁比第二個人。愛從來都係複雜嘅事,但我哋都想將最好留比對方。鄭秀文可以繼續開心,就係劉德華嘅贏。 — 人生並無永遠,只有盡力,費煞心神令所愛嘅人可以幸福,那怕只係多一秒嘅快樂,多美。