【明報專訊】部分因民主派初選案被控違反《港區國安法》嘅被告，其團隊過往都有賣物籌款，好多都係賣食物、飾物等，今次被告之一嘅立法會前議員梁國雄（長毛）就「賣自己」。佢嘅facebook專頁噚日發文，提到初選案審訊需時甚長，估計訟費達數百萬元，所以將會舉行賣物活動，發售長毛嘅figure（人像公仔）同明信片，目標籌400萬元，用於支付律師費同生活費，而帖文表明唔會開放畀海外嘅人訂購。
另賣明信片 唔收海外預訂
長毛因為初選案同多宗未經批准集結案，已經喺「牆內」近兩年，其中佢喺初選案唔認罪，噚日被裁定表證成立。佢嘅facebook噚日提到，由於案件耗時甚長，長毛需要一個信任嘅律師團隊處理初選案官司，訟費估計高達數百萬，仲形容兩袖清風嘅長毛必須舉行賣物籌措所需費用。今次活動將發售長毛嘅figure同明信片，以預售方式進行，詳情包括價錢稍後公布。
另一被告、民主黨前主席胡志偉嘅團隊都試過賣年曆卡、T恤籌訟費，而同案嘅前醫管局員工陣線主席余慧明亦試過喺市集擺檔，賣親手縫製嘅布袋等幫補生活費同訟費。
