緊急扭軚！巴塞會長遊說沙維繼續留隊

巴塞隆拿教練沙維喺1月底宣布，教埋今季就會離職，喺易帥消息公開之後，巴塞成績突然反彈。據西班牙《每日體育報》爆料，會長拉波塔正積極遊說沙維改變主意，下季繼續留隊執教，不過沙維目前無意接納，堅持季尾走人。

自從沙維宣布走人後，巴塞近5場西甲4勝1和，球迷喺比賽期間亦不斷高唱沙維個名以示支持。《每日體育報》消息指拉波塔同球會副會長最近都遊說沙維留隊，原因除咗球隊成績回勇之外，關鍵係巴塞希望引入嘅教練目標都無意上任，尤其巴塞喺財政問題下增兵困難，球迷又要求拎冠軍，令呢個「吃力不討好」嘅帥位冇人想接。

不過，拉波塔嘅如意算盤未必打得響，沙維日前被問到有冇機會「轉軚」，佢就實牙實齒回應：「我覺得呢個決定(季尾離任)係正確，球隊嘅演出亦都直線上升，我好感激球迷對我嘅支持，但我深信離開嘅決定，係對巴塞隆拿最好嘅做法。」