舊樓冇光纖 網速慢到癲
身處數碼化的年代，家居寬頻幾不可或缺，標榜快速與穩定的光纖上網愈見普及。然而，不少鄉郊村屋受制於地點與硬件不足而未能使用光纖上網，原來居於鬧市者亦有相同遭遇，因「揀都冇得揀」被迫接受電話銅線上網服務。立法會議員與學者均認為，通訊局有責任加強推動電訊商為可鋪設光纖的地區提供光纖上網服務，讓市民有更多選擇。
「附近啲大廈都有光纖上網，家維邨同我哋都係同一條街，佢哋幾年前就已經有好多plan（服務計劃）揀，仲要平好多！我哋就乜都冇得揀，真係同街唔同命！」陳先生（化名）數年前入住紅磡差館里一幢三十五年樓齡的單幢式唐樓，大廈一直未有光纖上網服務，住戶只能使用寬頻電話銅線上網服務（ADSL），即使電訊商不斷加價、兼且網速「超慢」亦只能啞忍。
被迫使用ADSL 80年代科技
記者到場了解「超慢」網速情況，發現陳先生的電腦下載及上載速度僅有不足8Mbps及1Mbps，「真係手機都快過佢！」陳又指多年來一直向通訊局反映，要求加強推動舊樓光纖上網服務，可惜未獲正視，「淨係識得話係市場主導，佢哋冇角色！政府又話要推廣數碼化服務，但通訊局又話冇角色幫市民搵多啲上網選擇，咁即係自相矛盾啦！」
「ADSL係八十年代科技，依家家居寬頻都講緊最少要有十幾Mbps，得嗰1Mbps真係好慢！」香港專業教育學院（屯門）資訊及通訊科技系系主任梁秉雄指出，現時「拉線」科技成熟，但礙於成本及利潤，令供應商拒絕為個別舊樓提供光纖上網服務，「因鑽地費貴，申請掘路紙亦唔易，幫單幢或者納入重建嘅舊樓拉線未必夠賺，冇法團就更加難同供應商傾拉線！」
未獲發掘路紙 難展工程
事實上，有暫未於上址提供服務的電訊商發言人透露，由於未獲當局發出掘路許可證，難以開展鋪線工程。至於為該大廈提供寬頻電話銅線上網服務的電訊商發言人則稱，由於近日投放更多資源提升網絡系統，故需調整收費。
通訊事務管理局發言人則說，現時寬頻服務的提供及網絡覆蓋範圍主要取決於營辦商商業考慮，收費水平主要取決市場力量，毋須獲該局批准。
資訊科技界立法會議員莫乃光認為，隨着市民對家居寬頻需求漸殷，當局絕對有責任檢視現有政策，加強通訊局推動舊樓光纖上網服務的角色，令市民有更多選擇。
（ireport_00036397）
記者：何穎賢