基斯活特首戴帽　般尼屠狼上岸在望

美職開鑼，即上《美職刨績王》：https://win.on.cc/football/league/mls/index.html　

周日晚（25日）英超頭場，下游分子般尼憑箭頭基斯活特，首次喺英超戴帽兼助攻，作客以4:0大勝狼隊，甩開尾3嘅富咸9分，護級在望。

之前3連敗嘅般尼，需要為護級搶分，今仗有正選門神尼克普比把關，不過最搶鏡嘅必屬基斯活特，15分鐘佢殺入禁區窄位抽射先開紀錄，6分鐘後杜韋麥尼爾截到對手傳波，即橫傳畀基斯活特近門射入。完半場前又係呢對孖寶合作，杜韋麥尼爾於右路開出角球，鶴立雞群嘅基斯活特頂入整多粒，呢位新西蘭中鋒首次喺英超戴帽，佢仲喺完場前再妙傳艾殊利韋斯活特遠射得手，最終帶領般尼大勝4比0，累積36分從尾4升上第14位，剩番5輪下領先尾3嘅富咸9分，護級機會高唱入雲。