吳業坤擲518萬屯門買樓：當係投資！

藝人吳業坤尋日出活動先話冇嘢撈，仲話搞到頭都白埋！之不過佢原來靜雞雞買樓，以518.3萬買入屯門OMA by the Sea第1座一個中高層單位，單位實用面積351方呎，開放式間隔，成交呎價約14,766元。

吳業坤接受東網訪問時話：「今次見到樓盤首期好低，同朋友都覺得值得投資嘅，所以同朋友夾份去抽，係用我個名，兩年後都唔知發生咩事，暫時同朋友以一個投資嘅角度去買樓，到時大家賣到就賣，賣唔到就租出去囉。」

另外，佢孖住好友音樂人Cousin Fung翻唱已故樂壇巨星陳百強嘅經典歌《深愛着你》，當中最大亮點，就係「貓奴」坤坤嘅「主子」Rabu都有出場！片中見佢一邊唱住「心中想你，如今想你」，一邊抱住「深愛着」嘅Rabu，流露出冧爆表情，而Rabu就深情望實坤坤，並伸手摸其下巴，真係隔住個mon都feel到佢哋有幾「恩愛」。