【3月份最有價值球員】- 東方龍獅 | 辛祖
東方龍獅前鋒辛祖於3月份連場取得入球，其於球場上嘅出色表現，除咗協助東方龍獅成功躋身足總盃決賽之外，亦都令呢位多產射手獲得香港足球總會及香港體育記者協會攜手選為，2019/20年度中銀人壽香港超級聯賽3月份最有價值球員。
喺上半季效力和富大埔嘅時候，辛祖已經為呢支新界地區球隊錄得8個入球，腳風大順。直到今年年初加盟東方龍獅之後，辛祖嘅入球產量持續穩定，每次為「新東家」披甲上陣皆有入球斬獲，為東方龍獅上陣4次卻已經錄得5球進賬。當中，於東方龍獅喺3月份所進行嘅三場足總盃賽事之中，辛祖亦為球隊連場建功，合共取得4個入球， 實屬東方龍獅打入今屆足總盃決賽嘅一大功臣。
個性平易近人，經常面帶笑容嘅辛祖，對於加盟東方龍獅僅僅數月就獲選為香港超級聯賽3月份MVP，感到甚為高興。
「當日離開和富大埔加盟東方龍獅，絕對唔係一個容易嘅決定，尤其是我喺和富大埔渡過咗一段美妙嘅時光，上季更加為呢支地區球隊贏得球會史上首個超級聯賽冠軍。不過職業足球世界往往就係咁，而加盟東方龍獅僅僅三個月就獲選為3月份MVP，呢個感覺真係妙極！自從成為東方龍獅一員之後，我不斷喺操練中努力付出，嘗試盡快了解球隊嘅踢法，並且作出配合。」
能傳擅射嘅辛祖指出，加盟東方龍獅之後能夠迅速交出表現，其一眾隊友著實功不可抹。「東方龍獅陣中擁有不少技術上乘嘅球員，例如黃威同艾華頓等等，同佢哋喺球場上並肩作戰，總會令我嘅工作變得非常簡單。只要我能夠傳球俾隊友，然後入楔到有利位置，隊友們往往都能夠作出美妙傳送，為我製造射門機會。」
受到2019冠狀病毒影響，香港超級聯賽賽程於3月下旬開始已經悉數暫停，不過辛袓透露自己喺疫情影響之下，仍然會每日喺家中訓練，希望保持良好狀態，準備迎接球季重開。「雖然本地球季暫停咗一段時間，不過我喺較早嘅時候，已經喺家居添置健身器材，俾我可以每日都保持一定程度嘅運動量，令我喺球季重開之時，能夠以理想狀態去協助球隊爭取最佳嘅成績。」
